Давлат солиқ бошқармаси Тошкентда ноқонуний тамаки ва спиртли маҳсулотлар савдосини чеклади

Тошкентда ўтказилган назорат тадбирида давлат солиқ хизмати органлари томонидан жами 11 275 дона (қути) умумий қиймати 109 400 000 сўмлик тамаки маҳсулоти, 791 шиша умумий қиймати 57 500 000 сўмлик алкоголь маҳсулотлари ноқонуний савдога қўйилгани аниқланган. Бу ҳақда «Дарё»га Тошкент шаҳар Давлат солиқ бошқармаси матбуот хизмати хабар берди.

Маълум қилинишича, Яшнобод туманидаги «Қўйлиқ» шоҳ бекати ёнида жойлашган савдо дўкони кўздан кечирилганида фуқаро Усмон Қулиев (исм ва фамилия ўзгартирилган) томонидан ҳеч қандай ҳужжатларсиз 779 дона (қути) умумий қиймати 7 936 000 сўмлик акциз маркасиз, хорижда ишлаб чиқарилган тамаки маҳсулотлари савдога қўйилгани аниқланган.

Шунингдек, Яшнобод туманидаги Зоирхўжа Суннатхўжаев (исм ва фамилия ўзгартирилган) бир неча бор огоҳлантирилганига қарамай тамаки маҳсулоти савдоси билан шуғулланишда давом этаётгани маълум бўлган. Бошқарма томонидан савдога қўйилган 18 турдаги умумий қиймати 20 838 000 сўмлик акциз маркасиз тамаки маҳсулотларининг ноқонуний сотилишининг олди олинган.

Шайхонтоҳур туманида ўтказилган тадбир давомида 14 нафар фуқаронинг белгиланган тартибда тадбиркор сифатида рўйхатдан ўтмай, 1 694 дона (қути) умумий баҳоси 15 560 000 сўмлик акциз маркали ва 1 616 дона (қути) умумий баҳоси 17 784 000 сўмлик акциз маркасиз тамаки маҳсулотларини савдога қўйгани аниқланиб, қонуний чора кўриш учун тегишли ҳужжатлар расмийлаштирилган.

Миробод туманида жойлашган савдо дўконида 29 турдаги 56 шиша, умумий қиймати 11 296 000 сўмлик акциз маркасиз, қалбаки акциз маркали ва яроқлилик муддати ўтган алкоголь маҳсулоти савдога қўйилгани аниқланган.

Учтепа туманида жойлашган савдо дўконида яроқлилик муддати ўтган ва эски акциз маркаси билан маркаланган алкоголь маҳсулотлари савдога қўйилгани маълум бўлган. Тадбир давомида 26 турдаги 706 дона умумий қиймати 33 341 000 сўмлик алкогол маҳсулоти ноқонуний савдога қўйилгани аниқланиб, қонуний чора кўриш учун тегишли ҳужжатлар расмийлаштирилган.

Қўшимча қилинишича, Бектемир тумани «Қўйлиқ деҳқон бозори»да Жамила Абдуллаева (исм ва фамилия ўзгартирилган) томонидан ҳеч қандай сифат сертификатига эга бўлмаган, умумий баҳоси 169 000 сўмлик қўлбола спирт маҳсулотлари, Мухаш Асанов (исм ва фамилия ўзгартирилган) томонидан 157 дона умумий қиймати 1 418 000 сўмлик алкоголь маҳсулоти ноқонуний савдога қўйилгани маълум бўлган.

Аввалроқ Бухоро вилояти Давлат солиқ бошқармаси томонидан дорихоналарда ноқонуний дори-дармон савдоси аниқлангани ҳақида хабар берилганди.