Андижон шаҳридаги 50-умумтаълим мактаби директор ўринбосари формасиз ва дарсга кеч келган педагог аёлнинг турмуш ўртоғи томонидан ўқувчилар кўз ўнгида калтаклангани ҳақида хабар берилганди. Мазкур ҳолат юзасидан вилоят ички ишлар бошқармаси расмий маълумот берди, дея хабар бермоқда «Дарё» мухбири Умиджон Мамарасулов.
Унда келтирилишича, ушбу ҳолат юзасидан тўпланган теровга қадар текширув ҳужжатлари 5 октябрь куни Андижон шаҳар ички ишлар органлари фаолиятини мувофиқлаштириш бошқармаси навбатчилик қисми журналидан рўйхатдан ўтказилган.
Терговга қадар текширув ҳужжатларига кўра, 2019 йилнинг 5 октябрь куни соат тахминан 13:30 ларда Андижон шаҳрида яшовчи фуқаро Т.У. ва бошқалар жамиятда юриш-туриш қоидасини қасддан менсимасдан, жамоат жойи ҳисобланган Андижон шаҳри, Ломоносов кўчасида жойлашган 50-сонли умумтаълим мактаби биноси ҳудудига келиб, мазкур мактабда маънавий-маърифий ишлар бўйича директор ўринбосари лавозимида ишловчи Ш.Ў. ва чақирувга қадар бошланғич тайёргарлик фани ўқитувчиси Ғ.А. билан асоссиз равишда ўзаро жанжаллашган. Т.У. ва унинг шериги томонидан Ш.Ў. ва Ғ.А.нинг тананинг турли қисмларига қўл ҳамда бошқа жисмлар билан зарбалар берган.
Суд-тиббий экспертиза бюросининг дастлабки маълумотномасига кўра, уларга қисқа муддатли соғлиқнинг бузилишига олиб келган енгил шикаст етказилган.
Олиб борилган терговга қадар текширув ҳаракатлари давомида аниқланишича, жанжалнинг келиб чиқишига Ш.Ў. ва Ғ.А.нинг шу мактабда ўқитувчи бўлиб ишловчи Д.Ю.га ишга мактаб формасида келмаганлиги юзасидан танбеҳ берилганлиги сабаб бўлган.
Мазкур ҳолат юзасидан Андижон шаҳар ИИОФМБ ҳузуридаги тергов бўлими томонидан Т.У. ҳамда унинг икки нафар шеригига нисбатан Жиноят кодексининг 277-моддаси 3-қисми билан жиноят иши қўзғатилиб, дастлабки тергов ҳаракатлари олиб борилмоқда.
Изоҳ (0)