Буйраги трансплантация қилинган 20 нафардан ортиқ бемор Соғлиқни сақлаш вазирлигига шикоят билан борди. Соғлиқни сақлаш вазирлиги томонидан беморларга текинга берилаётган «Панграф» дориси ўрнига «Ролиграф» номли дори касалларнинг аҳволини яхшилашдан кўра, оғирлашишига сабаб бўлмоқда, деб хабар беради «Togri.uz».
3 октябрь куни Соғлиқни сақлаш вазирлигига буйраги трансплантация қилинган 20 нафардан ортиқ бемор шикоят билан борган. Шикоятчилар республиканинг барча вилоятларидан келган бўлиб, аксар келганлар буйраги трансплантация қилинган беморлардир. Ҳаммасининг шикояти битта — Соғлиқни сақлаш вазирлиги томонидан беморларга текинга берилаётган «Панграф» дориси ўрнига «Ролиграф» номли дори берилмоқда. Бу эса кўпгина касалларнинг аҳволини оғирлаштирган.
«Йиғилганларнинг асосий шикояти дорини ўзгартирмаслик бўлса, кейингиси — вақтида берилиши. Бир-икки ой вақтида тарқатилган дори сабабсиз тўхтаб қолиши ҳам ҳаёти «қил» устида турганларни ташвишга қўймоқда», — дейилади хабарда.
Таъкидланишича, трансплантациядан сўнг умрининг сўнгигача ичиладиган дорини уч кун ичмаслик инсон ҳаётини хавф остида қолдиради. Бундан ташқари, бир йилда доимий ичадиган дорисини уч марта ўзгартириш саратон касаллигига олиб келиши мумкин.
Мана шундай муаммолар гирдобида қолганлар иложсиз вазирликка мурожаат қилиб келган. Улар «Ролиграф» ўрнига аввалдан ичиб келган «Панграф» дориси берилишини сўрамоқда.
Изоҳ (0)