2018 йил октябрь ойида «Дарё» нашри орқали самарқандлик тадбиркор Жамшид Шомуродов вилоят ҳокимининг тадбиркорлар билан учрашувида муаммоси ҳал этилмаётганлиги тўғрисида мурожаат қилганди. Орадан бир йил ўтган бўлса-да, ҳамон тадбиркорнинг муаммоси тегишли ташкилотлар томонидан ўрганилгани йўқ. Бу ҳақда «Дарё» мухбири Фарҳод Норбўтаев маълум қилди.
Ўтган йили ҳақиқат излаб 8 маротаба шаҳар прокуратураси, 20 маротаба вилоят прокуратураси, 8 бор Бош прокуратура, 10 маротаба Халқ қабулхонаси, 3 бора вилоят ҳокими Эркинжон Турдимовга мурожаат қилган Жамшид Шомуродов 2019 йил давомида ҳам ҳуқуқни муҳофаза қилувчи идораларга кўп қатнаган. Ҳатто Бош прокурор қабулига ҳам кирган. Бироқ шунча мурожаатларга қарамасдан тегишли ташкилотлар томонидан масала пайсалга солиниб, кўрилмай келинмоқда.
Самарқанд шаҳар ҳокимининг 2015 йил 27 ноябрдаги «Кўп қаватли турар жой биносини қуришга рухсат бериш ҳақида»ги қарори билан «Гарант қурувчи сервис» масъулияти чекланган жамиятига Самарқанд шаҳар, Гагарин кўчаси, 128-манзилда жойлашган уйни қонун талаблари асосида бузган ҳолда қайтадан янги бино қуриш учун рухсат берилган. Мазкур қарорда таркибида нотураржой бинолари мавжуд бўлган беш қаватли турар жой биносида яшаётган фуқароларга тегишли хонадонларни амалдаги қонун ҳужжатларида белгиланган тартибда кўчириш белгиланган. Қурилиши режалаштирилган кўп қаватли турар жой биносининг биринчи қаватидан бузилишга тушган биносига мутаносиб равишда ўз таннархи қийматида ажратиб бериш шарти билан бузилишдан бўшаган жами 2122 квадрат метр ер майдони ажратиш тўғрисидаги далолатнома тасдиқланиб, замонавий архитектура лойиҳалари асосида кўп қаватли турар жой биноси қурилишга рухсат берилган.
Самарқанд шаҳар ҳокимининг 2016 йил 19 декабрдаги қарори билан 2015 йил 27 ноябрдаги қарорга ўзгартириш ва қўшимчалар киритилган. Қарорнинг 1-бандида «Гарант қурувчи сервис» МЧЖга Самарқанд шаҳар, Фитрат кўчаси 1-йўлак, 1, 3, 5 ва 7-хонадонлар ҳамда Гагарин кўчаси, 128 ва 130-манзилдаги кўп қаватли турар жой эгаларини амалдаги қонун ҳужжатларида белгиланган тартибда кўчириш шарти билан шаҳар ҳокимлиги ер комиссиясининг 2016 йил 10 сентябрдаги 48-сонли «Қуриш учун танланган ер майдони далолатномаси» тасдиқланган ва замонавий архитектура лойиҳа ҳужжатлари асосида кўп қаватли турар жой бинолари қурилишга рухсат берилган деб ўзгартириш киритилган.
— Мулк ҳуқуқи асосида менга тегишли бўлган уйлар «Гарант қурувчи сервис» МЧЖ томонидан компенсация масаласи ҳал этилмасдан, мени розилигим олинмасдан бузиб ташланган, — дейди Жамшид Шомуродов. — Хусусан, Самарқанд шаҳар, Гагарин кўчаси 128-манзилдаги кўп қаватли турар жой биносининг 58, 61, 62 ва 64-хонадонлари бузиб ташланган.
Жамшид Шомуродовнинг таъкидлашича, бундан ташқари, 2007 йилнинг 31 августида имзоланган 2872-сонли олди-сотди шартномасида кўрсатилган 77-хонадон, 2008 йилнинг 27 май куни имзоланган олди-сотди шартномасидаги 105-хонадон, 2002 йил, 12- февраль куни имзоланган 202-сонли олди-сотди шартномасида кўрсатилган 59-хонадон, 2009 йилнинг 1 апрель куни имзоланган 31-сонли олди-сотди шартномасида кўрсатилган 33-хонадон, 2004- йилнинг 20 октябрь куни 2872-сонли олди-сотди шартномасида кўрсатилган 55-хонадон ва фуқаро Нурия Ботировадан сотиб олинган 32-хонадон суднинг ҳал қилув қарорисиз ноқонуний бузиб ташланган. Қолаверса, мазкур хонадонлар ичидаги жиҳозлар ҳам талон-торож қилинган.
—Президент Шавкат Мирзиёев 2019 йил 3 август куни «Фуқаролар ва тадбиркорлик субъектларининг мулк ҳуқуқи кафолатланишини сўзсиз таъминлаш бўйича қўшимча чора-тадбирлар тўғрисида»ги фармойишини имзолади. Самарқанд вилоятида мазкур қарор ижросини таъминлашни назорат қилиш бош прокурор ўринбосари С.Саидкаримов зиммасига юклатилган,— дейди Жамшид Шомуродов. – Бироқ Президент фармойишида айнан ушбу масалалар бўйича прокуратура шуғулланишини кўрсатиб ўтилган бўлса-да, Самарқанд шаҳар прокуратураси фармойишга зид равишда менинг аризамни кўриб чиқмасдан Самарқанд шаҳар ИИО ФМБ ТБ бўлимига юборган.
Вазирлар Маҳкамасининг 2006 йил 29 майдаги 97-сонли қарори билан тасдиқланган «Ер участкалари давлат ва жамият эҳтиёжлари учун олиб қўйилган фуқароларга ва жисмоний шахсларга етказилган зарарни қоплаш тартиби тўғрисида»ги низомнинг 9-банди талабига кўра, муаммо Самарқанд шаҳар ҳокимлиги ҳузуридаги товон бериш, етказилган зарарлар миқдори ва компенсация турини белгилаш бўйича комиссия томонидан кўриб чиқилмаган. Жамшид Шомуродовга тегишли бўлган бузилган хонадонлар учун бугунги кунга қадар компенсация масаласи ҳал этилмаган.
Компенсация масаласи ҳал этилмаганлигининг сабабларидан бири «Самарқанд шаҳар ҳокимлиги ҳузуридаги бузилишга тушган турар ва нотурар жой ҳамда кўчириладиган дарахтлар учун тўлов миқдори масаласини кўриб чиқишда тўлов миқдорини ва компенсация турини белгилаш бўйича комиссия таркибини тасдиқлаш тўғрисида»ги шаҳар ҳокимининг 2019 йил 18 апрелдаги қарори кеч қабул қилинган.
Масаланинг яна бир томони шундаки, «Гарант қурувчи сервис» масъулияти чекланган жамияти 2018 йилнинг 27 апрель куни 893858-сонли реестр рақам билан қайта давлат рўйхатидан ўтказилиб, бошқа жамият билан бирлашган ва «Next City» масъулияти чекланган жамияти номини олган. Яъни «Гарант қурувчи сервис» МЧЖ Жамшид Шомуродов билан боғлиқ муаммоларни бартараф этмасдан туриб, масалага учинчи ташкилотни ҳам аралаштирган.
— Самарқанд шаҳар ва вилоят прокуратураси, ички ишлар бошқармаларига икки йилдан буён қайта-қайта мурожаат қилиб келаман. Аммо бузилган 15 миллиард сўмлик мулкларим учун ҳали ҳам бир тийин ололганим йўқ. Бунинг ўрнига ҳуқуқ-тартибот идоралари Жиноят кодексининг 228-моддаси («Ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш») тегишли бандлари билан жиноят иши қўзғатиб, кейинчалик жиноят иши тўхтатилди. Бугунгача мурожаат қилмаган жойим қолмади ҳисоб. Барчасига бир хил жавоб оламан: «мулк эгаларининг розилик хатлари олинган, Вазирлар Маҳкамасининг тегишли қарорларига асосланиб, уй бузилган» деган мазмунда. Аниқроқ айтадиган бўлсам, мен мулкларимдан ажралиб мурожаат қиляпман, мен мурожаат қилган идоралар эса устимдан кулгандек «зарар қопланган» демоқда. Шу ёлғон маълумот республика идораларига ҳам тақдим этилмоқда, — дейди тадбиркор Жамшид Шомуродов.
Изоҳ (0)