Саудия Арабистони ҳукумат доиралари ва йирик ишбилармонларидан иборат делегация илк бор Наманганга келди. Бу ҳақда «Дарё» мухбири Азизбек Абдувалиев хабар бермоқда.
Меҳмонларга Ўзбекистоннинг ушбу мамлакатдаги Фавқулодда ва мухтор элчиси Улуғбек Мақсудов ҳамроҳлик қилди.
— Мазкур ташриф элчихонамиз, Саудия Арабистони Бош инвестиция қўмитаси ва Савдо-саноат палатаси ҳамда Наманган вилояти ҳокимлиги ҳамкорлигида ташкил этилди. Делегация таркибида Саудия Арабистони молия, Савдо ва инвестициялар ҳамда Атроф-муҳит, сув ресурслари ва қишлоқ хўжалиги вазирликларининг юқори мартабали вакиллари, Ajlan & Bros Holding Group, Awad Group, ELM, Al Shanawani, Gulf Pioneers каби 10 дан ортиқ йирик компания раҳбарлари бор, — деди Улуғбек Мақсудов.
Меҳмонлар дастлаб Наманган шаҳридаги Aisha home текстиль ва «Истиқлол текстиль дизайн» (Ideal бренди) корхоналарида бўлди. Бу ерда намойиш этилган тайёр кийим-кечаклар, меҳмонхона хўжалиги маҳсулотлари ва момиқ сочиқларни Саудия Арабистонига экспорт қилиш, корхоналарнинг доимий фаолият кўрсатувчи шоурумларини ташкил этиш масалалари муҳокама қилинди.
Тўрақўрғон туманидаги «Ширинлик» маданият саройида Наманган вилояти ва Саудия Арабистони ишбилармон доиралари иштирокидаги халқаро бизнес-форум бўлиб ўтди. Меҳмонлар форум доирасида ташкил этилган саноат ва қишлоқ хўжалик маҳсулотлари ярмаркасида вилоятда ишлаб чиқарилаётган маҳсулотлар билан танишди.
Вилоят ҳокими Хайрулло Бозоров ишбилармонларга қишлоқ хўжалиги, чорвачилик, энергетика, нефть-газ, фойдали қазилмалар, енгил саноат ва туризм каби соҳалардаги салоҳият, Наманганда фаолият юритаётган эркин иқтисодий зоналар ҳамда уларда инвесторлар учун таклиф этилаётган имтиёзлар ҳақида батафсил маълумот берди.
Туркиянинг Idealist Mimarlik архитектура компанияси вакили Ибраҳим Челепўвен компанияси томонидан тайёрланган «Нанай» кичик туристик зонаси лойиҳасини тақдим қилди. Янгиқўрғон туманида барпо этилиши режалаштирилаётган жаҳон стандартлари даражасидаги туристик мажмуа концепцияси меҳмонларда қизиқиш уйғотди.
Шунингдек, меҳмонларга Чортоқ туманининг инвестицион салоҳияти, ушбу ҳудудда амалга оширилиши режалаштирилган лойиҳалар ҳақидаги араб тилида тайёрланган видеолавҳа намойиш этилди.
Форум якунида 2B ва B2G форматида учрашувлар ўтказилди. Чуст туманидаги мис кони ҳамда Минбулоқ нефть ва газ конларига қизиқиш билдирган Gulf Pioneers инвестицион компанияси наманганликларни Саудия Арабистонида иш билан таъминлаш борасида ҳам ўз ҳамкорлигини таклиф қилди. Аждодлари водийлик бўлган Аюб Муҳаммад Авад ўзининг Awad Group компанияси билан Наманганда меҳмонхоналар қуриш ниятини билдирди.
Саудия Арабистони Бош инвестицион қўмитаси раҳбари Бадир Муҳаммад Алмуфгай Саудия Арабистони бизнеси Наманган билан туризм, нефть-газ, кимё, текстиль ва энергетика каби соҳаларда ҳамкорликка тайёр эканлигини таъкидлаб, бу борада мулоқотни давом эттириш учун вилоят ҳокимлиги вакилларини шу йил ноябрь ойида Ар-Риёд шаҳрида бўлиб ўтадиган Ўзбекистон ва Саудия Арабистони ҳукуматлараро қўшма комиссиясининг навбатдаги йиғилишига таклиф қилди.
Изоҳ (0)