Қарши халқаро аэропорти ёнида жойлашган боғ дарахтлари аёвсиз кесилиб, боғ пайҳон қилинмоқда. Ҳудудда истиқомат қилувчи 150 та хонадон вакиллари эса тирикчилигининг асосий манбаси бўлган мевали дарахтларнинг йўқ қилинишидан ташвишда.
Аҳоли мурожаатига асосан воқеа жойида бўлган «Дарё» мухбири Отабек Қўлдошевнинг ёзишича, аҳоли мазкур боғдаги мевали дарахтларни 1986—87 йиллардан эка бошлаган. Бу ерга «Қулмамат бобо» боғи номи ҳам берилган.
— Ушбу боғ ҳудудидан 12 сотих ерим бор эди, — дейди Наргиза Жумаева. — Олма, қароли, зардоли, гилос каби мевали дарахтлар етиштиргандик. Оиламизнинг тирикчилиги мана шу боғдан эди.
Наргиза Жумаеванинг айтишича, турмуш ўртоғи Россияда бўлса-да, тайинли иш тополмаётгани боис оиланинг асосий даромади шу боғ орқасидан бўлган.
— 16 ёшли ўғлим билан шу боғда ишлардик, — дейди Наргиза Жумева. — Тирикчилигимиз шу боғдан олинаётган ҳўл мевалардан эди. Энди нима қиламиз?
Ушбу ҳудуддаги боғ эгаларидан яна бири Дилшод Мусаевнинг маълум қилишича, боғдаги мевали дарахтларнинг кесилиши ҳақида аҳоли огоҳлантирилмаган.
— Ҳеч кимни огоҳлантирмай мевали дарахтларни кесиб ташлашмоқда, — дейди Дилшод Мусаев. — Бунга рухсат олишдимикин?
Қарши шаҳар ҳокими ўринбосари Улуғбек Авазовнинг топшириғига кўра, «Дарё» мухбирига мевали дарахтлар кесилишини асословчи ҳужжатлар тақдим этилди. Мазкур ҳужжатлардан англашилишича, шаҳар ҳокимлиги «Индорама Агро» ХК МЧЖга давлат ўрмон фондига кирмайдиган дарахт ва буталарни кесиш учун рухсатнома берган.
Қарши шаҳар ҳокими ўринбосари Улуғбек Авазов томонидан 2019 йил 18 сентябрь куни берилган рухсатномада «Индорама Агро» ХК МЧЖ томонидан қурилаётган офис ва меҳмонхона комплекси қурилиши туфайли 417 та мевали ҳамда манзарали дарахт кесилиши ёзилади. Бироқ рухсатнома муддати кўрсатилмаган.
Рухсатномада ёзилишича, у жойлардаги ўсимлик ва ҳайвонот дунёсини муҳофаза қилиш давлат назоратининг рўйхатидан ўтказилгандагина ҳақиқий.
Мазкур ҳужжат боғдаги мевали дарахтларни кесишга рухсат берадими ёки йўқми, ушбу саволга жавоб олиш мақсадида вилоят экология ва атроф-муҳитни муҳофаза қилиш бошқармаси бошлиғи Ғанишер Ибрагимов билан боғландик.
«Дарё» мухбири билан телефон орқали мулоқотга киришган Ғанишер Ибрагимовнинг айтишича, «Индорама Агро» ХК МЧЖнинг мазкур боғдаги 417 та мевали ҳамда манзарали дарахтларни кесиб ташлаши қонуний. Бу ҳаракати учун корхона давлатга ҳеч қандай жарима тўламайди. Боиси мазкур ташкилот хорижий корхона ҳисобланади.
— Вазирлар Маҳкамасининг 2019 йил 17 январдаги «Давлат ўрмон фондига кирмайдиган ерларда дарахтлар ва буталардан фойдаланишни тартибга солиш ва улардан фойдаланиш соҳасида рухсат бериш тартибини янада такомиллаштириш тўғрисида»ги қарорининг 43-бандига кўра, давлат бюджети, хорижий ва халқаро ташкилотлар кредитлари ва грантлари ёки халқаро молия институтларининг инвестициялари ҳисобига молиялаштирилаётган қурилиш ва реконструкция ишлари, шунингдек, Президент ва ҳукумат қарорлари, фармойишларида белгиланган тадбирларни амалга ошириш учун кесиладиган дарахтлар ва буталар, истисно тариқасида, белгиланган тўловлардан озод этилган. Давлат экология қўмитаси органларининг хулосалари ҳамда маҳаллий давлат ҳокимияти органлари томонидан бериладиган рухсатномалар асосида кесилади, — дейди вилоят экология ва атроф-муҳитни муҳофаза қилиш бошқармаси ходими Азиз Қурбонов.
Вилоят экология ва атроф-муҳитни муҳофаза қилиш бошқармаси масъулларининг гапига қулоқ тутадиган бўлсак, «Қулмамат бобо» боғидаги 417 та мевали ҳамда манзарали дарахтлар учун ҳеч қандай жарима ундирилмайди.
Қарши шаҳар ҳокимлигидан маълум қилишларича, шаҳар ҳокимининг 2019 йил 30 апрелдаги қарорига мувофиқ ҳозирда мевали дарахтлари кесилаётган ушбу боғ жойлашган 2,25 гектар ер майдони «Индорама Агро» ХК МЧЖга офис ва меҳмонхона қуриш учун ажратиб берилган.
Оиланинг асосий боқувчиси бўлган ва ногирон фарзанди билан яшаётган Норгул Ҳамидованинг шикоят қилишича, 1986—1987 йилларда ўз қўллари билан экилган мевали дарахтлар бугун оила даромадига айланганда аёвсиз кесилмоқда.
Қарши шаҳар ҳокими ўринбосари Улуғбек Авазовнинг айтишича, аҳоли мазкур боғдан ўтган йиллар давомида ноқонуний фойдаланиб келган. Умуман солиқ тўламаган.Аҳоли вакилларининг маълумот беришича, 1990 йил 29 август куни шаҳар ижроқўмининг ўша пайтдаги раиси Анвар Шукуров томонидан қарор чиқарилиб, ушбу боғ «Қулмамат бобо» боғи деб аталган.
Улуғбек Авазов эса ўша қарорга кўра мазкур «Қулмамат бобо» боғи ўша пайтнинг ўзидаёқ «горхомкоз» — шаҳар ободонлаштириш бошқармаси таркибига киритилганлиги, демак, боғ ҳудуди шаҳар ҳокимлиги ихтиёрида бўлганини айтяпти. Ҳоким ўринбосарига кўра, мазкур «Қулмамат бобо» боғи дея аталаётган ер айни кунгача шаҳар ҳокимлиги захира фондидаги ер ҳисобланган.
Мевали ҳамда манзарали дарахтларга эгалик қилиб келган мурожаатчилар билан мулоқот қилганимизда улар 2019 йил 19 август куни нафақат Қарши шаҳар ҳокимлиги, балки вилоят ҳокимлиги, Президент Халқ қабулхонасига ҳам мурожаат йўллашганини, аммо ҳеч қайси мутасадди аҳолига тўғри ва аниқ маълумот бермаганидан нолимоқда. Шаҳар ҳокимлиги мазкур масалада минг ҳақ бўлса-да, мурожаатчиларга вазиятни тўғри тушунтирмагунча англашилмовчиликлар ва такрорий мурожаатлар бўлиши тайин.
Изоҳ (0)