Тошкент метроси учун йўловчиларни тетиклаштириш ва тинчлантириш имконини берувчи ёритиш тизимига эга бўлган 45 та поезд харид қилиш режалаштирилмоқда. Бу ҳақда Тошкент метрополитени раҳбари Ойбек Худойқулов Россиядан етиб келган 20 та янги авлод вагонининг тақдимотида маълум қилди, деб ёзмоқда Fergana News.
Ҳар бир поезд состави тўртта вагондан ташкил топган: иккита асосий моторли ва бири моторли ва бири моторсиз иккита оралиқ вагон. Йўловчилар бутун состав бўйлаб бемалол ҳаракатланиши учун вагонлар ўртасида ўтиш жойи мавжуд. Яхши шовқин изоляцияси ва замонавий технологиялар қўллангани ҳисобига поездлар ҳаракати жуда текис ва шовқинсиз бўлади. Поездларда ҳароратни назорат қилиш тизими ўрнатилган ва деразалардаги махсус шиша пакетлар салонда оптимал ҳароратни сақлашга имкон беради. Вагонларда видеокузатув ва ёнғин сигнализацияси датчиклари мавжуд.
Эшиклар устидаги ёруғлик диодли панеллар ҳаракат йўналишини кўрсатади ва бекатлар номини акс эттиради. Бундан ташқари вагонларда метрополитен картаси жойлаштирилган сенсорли экран мавжуд бўлиб, зарурат туғилганда, йўловчилар метрополитен схемасини ўрганиши, керакли бекатни топиши, ҳаракат йўналишини тузиши, йўлга кетадиган вақтни ҳисоблаши ва бошқа фойдали маълумотларни олиши мумкин.
Янги составлар қурилиши 2019 йилда якунланиши режалаштирилаётган Юнусобод ва Сергели йўналишларида ҳаракатланади. Мазкур 20 та вагон Россиянинг «Метровагонмаш» компанияси томонидан ишлаб чиқарилган.
Эслатиб ўтамиз, мазкур 20 та вагоннинг хариди «Ўзбекистон темир йўллари» ва «Метровагонмаш» ўртасида ўтказилган музокаралар натижасида амалга оширилди. Қиймати 27,7 миллион евро бўлган шартноманинг 22,14 миллион евроси Россиянинг тараққиёт ва ташқи иқтисодий фаолият банки кредити ҳисобига ҳамда 5,54 миллион евроси Ўзбекистон тикланиш ва тараққиёт жамғармаси ҳисобига молиялаштирилган.
Изоҳ (0)