Ўзбекистоннинг 4 та халқаро аэропортида «Очиқ осмон» тартиби ишга тушди

Ўзбекистонда 2019 йилнинг 1 октябридан «Қарши», «Нукус», «Термиз» ва «Бухоро» халқаро аэропортларида «Очиқ осмон» тартиби ишга тушди.

Президентнинг жорий йил 13 августдаги «Ўзбекистон Республикасида туризм соҳасини янада ривожлантириш чора-тадбирлари тўғрисида»ги фармони билан 1 октябрдан «Қарши», «Нукус», «Термиз» халқаро аэропортларида «бешинчи ҳаво эркинлиги»ни қўллаган ҳолда «Бухоро» халқаро аэропортида «бешинчи ҳаво эркинлиги»ни хорижий давлатлар фуқароларини ташишда қўллаган ҳолда «Очиқ осмон» тартибини жорий этиш белгиланган.

Бу тартибнинг асосий тамойиллари нафақат транзит парвозлар учун ҳуқуқ тақдим этиш, балки ҳукуматнинг йўналишлар ҳамда авиакомпанияларнинг нарх ҳосил қилиш ва белгилаш жараёнларига аралашмаслик, шунингдек, самолётлар ва уларнинг қуввати турларига доир чекловларнинг йўқлигини англатади.

Жаҳон тажрибасида кузатилганидек, «Очиқ осмон» сиёсатининг қўлланилиши йўловчи ташишни ўртача 35 фоизга ошириш, авиачипталар нархини 20 фоиздан 40 фоизгача пасайтириш имконини беради. Шунингдек, минглаб янги иш ўринлари яратилади.