Фарғона вилоятида учта туман пахта режасини бажарди

Фарғона вилоятининг Ёзёвон, Қўштепа ва Риштон тумани республикада биринчилардан бўлиб, 15 иш кунида пахта топшириш шартномавий режасини бажарди, деб хабар бермоқда ЎзА.

Вилоятда жорий йилда 82,1 минг гектар майдонда чигит қадаб, мўл ҳосил етиштирилди. Ҳудудда пахта йиғим-терими ишларини уюшқоқлик билан ўтказиш мақсадида 1 370 та терим отряди ташкил этилиб, 215 200 нафардан ортиқ теримчи ихтиёрий пахта йиғиштириб олишда иштирок этмоқда.

Ўтган йили Риштон туманида «Рус—Ўзбек текс» масъулияти чекланган жамиятида инновацион лойиҳа асосида пахта етиштиришда биринчи марта кластер усули қўлланилиб, юқори ҳосил олинди. Жорий йилда эса вилоятдаги 9 та туманда пахта-тўқимачилик кластери ташкил этилиб, фермер хўжаликлари билан шартнома тузилган.

Ёзёвон тумани пахтакорлари давлатга 14,8 минг тонна пахта топшириб, белгиланган режани бажарди.

Қўштепа туманида Fergana Global textile масъулияти чекланган жамияти томонидан 7,24 минг гектар майдонда биринчи марта кластер асосида пахта етиштирилди. Туман пахтакорлари давлатга 19,9 минг тонна пахта топшириб, шартномавий режани бажарди. 165 та фермер хўжалиги билан шартнома тузилган бўлиб, уларнинг аксарияти пахта режасини ортиғи билан бажарди.

Риштон тумани ҳам 5,95 минг гектар ер майдонида 15,9 минг тонна пахта етиштириб, белгиланган шартномани бажарди. «Рус—Ўзбек текс» масъулияти чекланган жамияти жорий йилда ҳам мўл ҳосил олиш тадбирларини кўрди. Ўртача ҳосилдорлик ҳар бир гектарга 30 центнерни ташкил этди.