Соатбай иш ҳақининг оширилиши муносабати билан ўқитувчиларга ҳақ тўлашда келиб чиққан тафовутлар, ўқитувчилар ҳақидан «ушлаб қолинган» пул ҳақида июль ойи охирида «Дарё» колумнисти ва «Домлажон» Telegram-канали асосчиси Исроил Тиллабоевнинг мақоласи эълон қилинган эди. Мавзу ҳали ҳам давом этмоқда.
Хабарингиз бор, яқинда Молия вазирлигига ўқитувчилар номидан мурожаат билан чиққан эдим. Унинг қисқача мазмуни қуйидагича:
Халқ таълими вазирлиги ҳамда Бандлик ва меҳнат муносабатлари вазирлигининг 2018 йил 27 июлдаги «Умумий ўрта таълим муассасаларининг педагогик мутахассисликлари бўйича намунавий йиллик иш режасини шакллантириш тартиби тўғрисидаги йўриқномани тасдиқлаш ҳақида»ги қўшма қарорида алоҳида қилиб соатбай ишлаган ўқитувчилар дарс соатига асосий ўқитувчи билан тенг тартибда маош тўланиши ва бу жараён 2018 йил 1 ноябридан амалга оширилиши бегилаб қўйилган. Лекин барча жойларда ўриндошлик асосида ишловчи ўқитувчиларнинг соатбай иш ҳақи асосий ўқитувчиникига нисбатан кам ҳисобланган.
Шундан сўнг Молия вазирлиги ўзининг жавоб мақоласида ҳеч қандай англашилмовчилик бўлмагани ҳақида хабар берди. Ушбу жавобдан қониқмаганим боис ҳар икки вазирликка аниқ фактлар келтирган ҳолда қўшимча дарс соатлари ва асосий дарс соатлари орасида катта фарқ борлигини кўрсатиб бердим. Шундан кейин Молия ва Халқ таълими вазирликлари 2018 йил ноябридан 2019 йил март ойигача ўриндош дарс соатлари учун кам ҳақ тўлаб келинганини тан олиб, фарқдаги сумма қайта ҳисоб-китобга кўра тўлаб берилишини ўз сайтида маълум қилди.
Топшириқ 2019 йил 31 июль куни барча туман молия ва халқ таълими бўлимларига қўшма буйруқ асосида берилди. Минг афсуски, орадан шунча вақт ўтган бўлишига қарамай, буйруқ ҳали етиб бормаган ва ёки етиб борса ҳам, унинг ижроси билан қизиқмаётган туман халқ таълими ва молия бўлимлари кўп. Яқинда шахсий Telegram-каналимга шу масала юзасидан сўровнома жойладим.
Молия вазирлигидан бу буйруқ ижроси республиканинг нечта туманида тўлиқ охирига етказилгани, дарс соатларидаги фарқлар тўлаб берилмаётганининг сабаби ва вазирлик буйруғи ижросини таъминламаган туман молия бўлимлари раҳбарларига қандай чора кўрилгани ҳақида жавоб кутиб қоламиз, зеро «Ижро интизомини мустаҳкамлаш чора-тадбирлари тўғрисида»ги Вазирлар Маҳкамасининг қарори ижроси барчага баробар.
Муаллиф фикри таҳририят нуқтаи назаридан фарқ қилиши мумкин.
Изоҳ (0)