28 сентябрь куни Ўзбекистон ва Америка Қўшма Штатлари ўртасида таълим тараққиётига кўмаклашиш бўйича муҳим келишув (DOAG) имзоланди. Бу ҳақда Халқ таълими вазирлиги матбуот хизмати хабар берди.
Ҳужжатни Халқ таълими вазири Шерзод Шерматов, АҚШ элчихонасининг вакили Алан Мелсар ва USAID’нинг Марказий Осиё минтақавий ваколатхонаси раҳбари вазифасини бажарувчиси Жули Саусфилд имзолади.
Мазкур келишувга кўра, АҚШ ҳукумати келгуси беш йил давомида Ўзбекистон таълим соҳасидаги ислоҳотларни қўллаб-қувватлаш учун 50 миллион долларгача маблағ ажратади. Келишув доирасида АҚШ ҳукумати маблағнинг 19,5 миллион долларга тенг бўлган биринчи қисмини ажратди.
Бу келишув АҚШ ва Ўзбекистон ҳукуматлари ўртасидаги биринчи кенг қамровли грант шартнома бўлиб, у Америка Қўшма Штатларининг Ўзбекистон таълим соҳасидаги тараққиётини қўллаб-қувватлаш борасидаги узоқ муддатли мажбуриятини белгилайди. Ушбу битим асосида молиялаштирилган тадбирлар бошланғич мактабларда ўқиш ва математикадан дарс бериш натижаларини яхшилаш, ахборот технологияларидан фойдаланиш ҳамда инглиз тилини ўқитишда Ўзбекистон ҳукумати билан ҳамкорликда амалга оширилади.
Лойиҳа Халқ таълими вазирлигига ўқувчиларнинг ахборот технологиялари соҳасида билим ва кўникмаларини оширишга қаратилган «IT Nation» ташаббусини амалга оширишда илмий асосланган стратегия яратишда кўмак беради.
USAID агентлиги умумтаълим мактабларининг бошланғич синфларида ўқиш ва математика (EGRA i EGMA) фанлари бўйича тадқиқот ишлари олиб борилади. Ушбу тадқиқотлар ўғил-қизларнинг билимидаги бўшлиқларни аниқлашга ёрдам беради ва ушбу муаммоларни бартараф этиш чораларини кўради. Мазкур лойиҳага USAID қўшимча 1,5 миллион доллар ажратади.
Шунингдек, USAID агентлиги лойиҳа доирасида Халқ таълими вазирлигига замонавий таълим усулларини жорий этиш йўллари билан бир қаторда мактабларда инглиз тилини ўқитишни такомиллаштиришга қаратилган «English speaking nation» дастурини амалга оширишда ёрдам беради. Агентлик ушбу лойиҳани амалга ошириш учун яна 5 миллион доллар тақдим этади.
Изоҳ (0)