Наманган шаҳрида 27 сентябрь куни нишонланган Бутунжаҳон туризм кунида маҳаллий меҳмонхоналар сони яна биттага кўпайди. Бу ҳақда «Дарё» мухбири Азизбек Абдувалиев хабар бермоқда.
Шаҳар марказида қад ростлаган «Grand Sherdor» бутик-отели шу тоифадаги Ўзбекистондаги учинчи, Фарғона водийсида эса илк меҳмонхона ҳисобланади.
Унда ўзига хос жиҳозланган ва бир-бирини такрорламайдиган 60 та хона бўлиб, 95 ўринга мўлжалланган. Бу ерда йилига 20 минг нафар меҳмонга юқори сифатли хизмат кўрсатилади.
«Grand Sherdor» Наманган шаҳридаги ҳисоб бўйича 15-меҳмонхона бўлди. Улар бир пайтнинг ўзида 1200 кишини қабул қилиш имконига эга.
Очилиш маросимида иштирок этган шаҳар ҳокими Шавкатжон Абдураззоқовнинг таъкидлашича, вилоят марказида яна 12 та меҳмонхона қурилиши кўзда тутилган. Зеро Наманганга келаётган хорижлик меҳмонлар, хусусан, инвесторлар сони кун сайин ортиб бормоқда.
Меҳмонхоналарнинг иккитаси жорий йил охирига қадар фойдаланишга топширилади.
Изоҳ (0)