Коллеждошлари томонидан аёвсиз дўппосланган марҳум Жасурбек Иброҳимовнинг ота-онаси 650 млн сўм компенсация талаб қилмоқда

25 сентябрь куни Тошкентнинг фуқаролик ишлари бўйича Мирзо Улуғбек туман судида Жасурбек Ибрагимовнинг ота-онаси — Нилуфар Алиева ва Муҳаммаджон Турсуновнинг Исломбек Тўлаганов ва унинг ота-онасига нисбатан даъвоси юзасидан эшитув бўлиб ўтди. Бу ҳақда «Nuz.uz» хабар бермоқда.

Исломбек Тўлаганов Миробод туман судининг 2017 йил 30 октябрдаги ҳукми билан курсдошининг ўлимида айбдор деб топилган ва 6 йил қамоқ жазосига ҳукм қилинганди. 2018 йил 20 декабрда эса Навоий шаҳар суди қарори билан қамоқ жазоси ахлоқ тузатиш ишларига ўзгартирилган. Тўлагановнинг ота-онаси бугунги кунгача 151 миллион 732 минг 760 сўм миқдорида моддий харажат ва 500 миллион сўм миқдорида маънавий зарар қопланишини талаб қилиб келмоқда.

Суд эшитувлари чоғида Исломбекнинг отаси Абдужалил Расулов унга тақдим этилган даъвогарларнинг моддий харажатлари рўйхатига эътироз билдирди. Унинг айтишича, рўйхатдаги бирор банд квитанция ёки чек билан мустаҳкамланмаган, бу эса уларда кўрсатилган суммалар ҳақиқийлигига ишониш имконини бермайди.

Расулов ҳалок бўлган талабанинг ота-онасини ўғиллари ўлимидан наф кўришга уринишда айблади ва мазкур фожиага алоқалари бўлмагани учун уни ҳамда турмуш ўртоғи Зумрад Мамбетовани жавобгарлар қаторидан чиқаришни сўради.

«Фарзандинг ўлим билан олишаётганда уни қутқариш учун албатта шошилинч равишда дори-дармонлар керак бўлади. Дафн маросимлари чоғидаги ҳолат ҳақида ҳам шуни айтиш мумкин. Ҳимоям остидаги аёл квитанция ёки чекларни сақлаб қўйиш зарурлиги ҳақида шу сабаб ўйлаб ҳам кўрмаган. Қолаверса, у ўсимтани олиб ташлаш бўйича иккинчи оғир операцияни бошидан кечирди. Стресс барибир ўзини билдирди. Биз ҳали бу бўйича ҳеч нарса даъво қилганимиз йўқ», – деди бунга жавобан жабрдийда томон адвокати Лола Исмоилова.

Суднинг келгуси муҳокамаси маҳкама қабул қилинган тақдимномалар билан тўлиқ танишиб чиқиши учун 14 октябрга белгиланди.