Тошкентда ИИББнинг 50 нафар ходими боди-камералар билан фаолият олиб боришни бошлади, деб хабар бермоқда Тошкент шаҳар ИИББ матбуот хизмати.
Уларнинг 32 нафари ЙҲХБ ЙПХ инспекторлари ва 18 нафари патрул-пост хизмати ходимларидир. Боди-камералар 19 сентябрдан тест тариқасида ишга туширилган.
Кейинчалик Тошкент шаҳар ички ишлар органларининг барча бўлинмалари, улар қаторида қўлга олинган, ҳибсга олинган ва айбланган шахсларни, шунингдек, маъмурий қамоқ қўлланилган шахсларни конвойлаш ва этаплаш билан шуғулланувчи ходимларнинг фаолиятида ҳам боди-камералардан фойдаланиш йўлга қўйилади. Шу тарзда кейинги йилнинг бошига қадар хизмат давомида боди-камераларни ишлатиш, маълумотларни мобил узатиш, қайта ишлаш, сақлаш ва таҳлил қилиш, жараённи хизмат олиб бориш давомида назорат қилиш бўйича амалий кўникма ҳосил бўлади.
Ўзбекистонда ЙПХ ходимларининг боди-камералар билан фаолият юритиши 2020 йилнинг 1 январидан бошланади.
Боди-камералар ҳақида нималарни билиш зарур?
Боди-камера мосламаси аудио ва видеоконтентни (FullHD форматида) ёзиш ва марказлашмаган тарзда сақлаш, кейинчалик кўриб чиқиш, фавқулодда вазиятларда марказлашган диспетчерлик хизматига «ҳавотир» сигналини етказиш, реал вақт режимида мобил гуруҳларнинг жойлашувлари ва фаолиятларинин масофадан туриб мониторинг қилиш имкониятини берувчи мосламадир. Қизиқарлиси, боди-камера мосламаси инфрақизил ёритиш қурилмаси билан жиҳозланган бўлиб, ушбу қурилма тунги вақтда ҳам ўн метрлик масофани ёритиб, видеога олиб бориш имкониятини беради.
Ходимда контентни ёзиш жараёнига аралашиш, уни таҳрир қилиш ва ўчириш имконияти йўқ: камера, ходим уни қабул қилиш вақтидан бошлаб, қайтариб топширгунга қадар видеога олиб боради. Мослама корпуси очилмаслиги учун махсус ҳимоя билан жиҳозланган.
Шунингдек, мослама ёрдамида радиоалоқага чиқиш имконияти бўлиб, ушбу имконият ходимларни рациядан халос қилади.
Ёзувлар натижаси махсус серверда бир ой давомида сақланади. Боди-камераларни ишлатиш учун зарур бўлган ахборот тизимида мониторинг марказини ташкиллаштириш ҳам кўзда тутилган. Айнан ўша ерда боди-камералар томонидан қайд этилган маълумотлар сақланади ва кўриб чиқилади. Мосламанинг хотира картасидан серверга маълумотларни кўчириш, махсус дастурий таъминот томонидан WI-FI маълумотлар кўчириш симсиз тармоғи ёрдамида доимий дислокация жойига етиб келгач амалга оширилади (архивга сақлаш жараёни инсон аралашувисиз амалга ошади). Марказ операторида мосламага масофадан туриб боғланиш ва назорат қилиш имконияти мавжуд.
Мониторинг марказидаги махсус электрон картада ҳар бир ходимнинг айни вақтда жойлашган манзили ҳамда ушбу манзилнинг патрул йўналишига мувофиқлиги акс этади.
Бундан ташқари, шу ерда фавқулодда вазиятлар ҳолатларида ҳаракатлар координацияси амалга оширилади: мониторинг марказига автоматик тарзда гео, аудио ва видеомаълумотлар ёпиқ (ҳимояланган) алоқа каналлари орқали етказиб турилади.
Изоҳ (0)