Давоми: Афғонистонда бошланган президентлик сайловларида учта асосий сиёсий гуруҳ кураш олиб бормоқда
Tolo News телеканалининг маълумотларига кўра, рўйхатга олинган жами сайловчилар сони 9,6 миллион кишини ташкил этади. Мамлакатнинг 34 вилоятида 5373 та сайлов марказлари очилган, бироқ хавфсизлик нуқтаи назаридан уларнинг 445 таси ёпилиши кутилмоқда.
Овоз бериш жараёни маҳаллий вақт билан соат 15:00 га қадар давом этади.
Афғонистон президентлигига номзод сифатида 18 киши даъвогарлик қилмоқда, жумладан, улар орасида мамлакатнинг амалдаги президенти Ашраф Ғани ва бош вазир Абдулла Абдулла ҳам бор.
Таъкидланишича, сайловларда биометрик тизим ёрдамида тасдиқланувчи овозларгина ҳисобга олинади. Масаланинг эътиборли томони, тизим учун фотосурат лозим, бу эса афғон аёллари учун диний тарафдан номақбул ҳисобланади.
Аввалроқ, «Толибон» ҳаракати сайлов марказларига, шунингдек, сайлов комиссияси ходимлари ва ҳуқуқ-тартибот органлари ходимларига ҳужум қилиш билан таҳдид қилганди.
Афғонистон ички ишлар вазири сайловларда хавфсизликни таъминлаш мақсадида миллий мудофаа ва хавфсизлик кучларидан 72 минг ходим жалб этилганини таъкидлаган. Бундан ташқари 20—30 минг нафар ҳарбий ёрдам кўрсатишга шай ҳолатда турибди.
Изоҳ (0)