Туркманистоннинг Туркманбоши шаҳридан 12 километр узоқликда жойлашган Аваза курортида аёлларга чўмилиш кийимида юриш тақиқланди. Fergana News’нинг хабар беришича, қоидани бузганлар 200 манат (27 сентябрь ҳолатига кўра 57 доллар) миқдорида жаримага тортилади.
Хабарда айтилишича, тақиқ нафақат бикиниларга, балки очиқ ёки тор кийимларга ҳам тааллуқлидир. Аёлларга кўйлакларида чўмилишига тўғри келмоқда. Дресс-кодни соҳилда патруллик қиладиган махсус полициячилар кузатади.
Таъкидланишича, бу маҳаллий сайёҳларни Авазадан чўчитмоқда ва улар дам олиш учун Каспий соҳилларидан бошқа жойларга бормоқда. Тақиқ бу йилги таътил мавсумидан амал қилишни бошлаган. 2018 йилда ҳам чекловлар бўлган, лекин унда текширув бунчалик қаттиқ бўлмаган ва аёллар жаримага тортилмаган.
Шу билан бирга, Туркманистон ҳукумати ўз фуқаролари ташқи кўринишида консерватизмни сақлашга интилиб, ахлоққа зид деб топилган айрим кийим ва пардоз муолажаларига қарши мунтазам курашиб келмоқда.
2018 йилда мамлакат бозорларида бикини ва шорти сотишга норасмий тақиқ жорий этилган. Кейинчалик қоматни билдириб турадиган тор кўйлакларга ҳам тақиқ қўйилган. Унинг ўрнига қоматни бутунлай ёпиб турувчи, енги билакларгача бўлган фақат тўғри бичимдаги узун кўйлаклар тафсия қилинган. Ашхободдаги давлат муассасаларида ишлайдиган аёлларга эса тирноқларни ўстириш ва бўяш тақиқланган.
Изоҳ (0)