Tik Tok’да чеченлар сепаратизми ва Путин ҳақида видеоларни жойлаштириб бўлмаслиги маълум бўлди

Хитойнинг ByteDance компаниясига қарашли қисқа видеолар сервиси ҳисобланган Tik Tok’да Хитой ҳукуматининг сиёсатига қарши бўлган материалларни жойлаштириб бўлмайди. Бу ҳақда Tik Tok операторларининг йўриқномасида ёзиб қўйилган, деб ёзмоқда The Guardian’га асосланиб Meduza. Нашр аввал бу ҳужжатлар ҳеч қаерда чоп этилмаганлигига урғу берган.

Tik Tok’да тақиқланган контент икки турга бўлинади. Биринчи категорияга мансуб видео ижтимоий тармоқдан ўчирилади ва уни юклаган фойдаланувчи блокланиши мумкин. Иккинчи тоифадаги видео Tik Tok’да қолади, лекин сервис алгоритмлари унинг оммавийлашишига йўл қўймайди. Фойдаланувчи эса нима учун ўз видеоси кўп кўрилмаётганини тушуна олмай хуноб бўлади. Аслида унинг материали иккинчи тоифага мансуб деб топилган.

Биринчи тоифага «Фалуньгун» ҳаракати, «Аум Синрике» оқими ёки «Момо» интернет ўйинини қўллаб-қувватловчи видеолар киради. Иккинчи категорияда эса Хитой сиёсатини танқид қилувчи, Камбоджадаги миллатчиликка қарши Тяньменйи майдонидаги намойишлари ҳақидаги видеолар бор. Шунингдек, Tik Tok миллатлараро, диний низолар ва замонавий сепаратизм, хусусан, Чеченистон, Шимолий Ирландия, Тибет ва Тайвандаги воқеаларга оид материаллар тарқалишига ҳам йўл қўймайди.

Шу билан бирга сервис 20 нафар хорижлик етакчи раҳбарга оид стоп-листга ҳам эга. Улар сирасига Шимолий Корея собиқ раҳбарлари Ким Ир Сен ва Ким Чен Ир, ҳозиргиси Ким Чен Ин, Ҳиндистон озодлиги ҳаракати етакчиси Махатма Ганди, Ҳиндистон бош вазири Нарендра Моди, Япония ҳукумати раҳбари Синдзо Абэ, АҚШ президенти Дональд Трамп ва Россия президенти Владимир Путин киради. Рўйхатга Хитой Халқ Республикаси раиси Си Сзинпин киритилмаган.

ByteDance баёнотида The Guardian нашр этган ҳужжатлар 2019 йилдан ўз кучини йўқотганини билдирган. Компания модераторлар учун янги йўриқномаларда муайян мамлакат ёки низолар ҳақида эслатмалар йўқлигини таъкидлаган.

«Энди биз ҳудудларга мослашган ҳолда фаолият олиб боряпмиз. Модерация сиёсати учун локал яъни контентни яхши тушунадиган модераторлар ишга ёлланади», — дейилади ByteDance баёнотида. Шунингдек, компания ўз ахборот сиёсатида контент борасида кўпроқ шаффофликка интилишини билдирган.