Саудия Арабистонининг валиаҳд шаҳзодаси Муҳаммад бин Салмон саудиялик журналист Жамол Қошиқчининг ўлими учун ўзини жавобгар деб билади. У бу ҳақда PBS телеканалининг ҳужжатли фильми учун берган интервьюсида маълум қилган.
«Бутун жавобгарлик менинг зиммамда, чунки бу иш менинг иш вақтимда содир бўлди», — дейилади фильм анонсида. Фильмнинг тўлиқ версияси 1 октябрь куни намойиш этилиши кутилмоқда.
The Washington Post газетасида ишлаган Жамол Қошиқчи 2018 йил октябрида ўлдирилган эди. Туркия расмийлари, АҚШ Сенати ва Марказий разведка бошқармасининг тахминига кўра, журналистни ўлдириш ҳақидаги буйруқ Саудия Арабистони валиаҳд шаҳзодаси Муҳаммад бин Салмон томонидан берилган.
Ар-Риёд бу каби айбловларни рад этиб, қотилликни мамлакат куч ишлатар тузилмаларнинг алоҳида ходимлари ташаббуси деб атаган эди. Ушбу жиноятни содир этишда гумонланаётганлар Саудия Арабистонида судга топширилган, уларга ўлим жазоси тайинланиши мумкин.
Изоҳ (0)