23 сентябрь куни «Озодлик» радиосининг Facebook’даги саҳифасида «Қоидани бузган бошқалар, аммо жарима тўлови биздан талаб қилинмоқда» номли пост эълон қилинган эди. Тошкент шаҳар ИИББ матбуот хизмати ушбу маълумот ҳақиқатдан йироқлигини маълум қилди.
ИИББ ушбу турдаги қоидабузарликларни қайд этиш тизимининг ишлаш принципини тушунтириб ўтди. Йўл ҳаракати хавфсизлигини компьютерлаштирилган бошқариш тизими (ЙҲХКБТ) автоматлаштирилган: у йўл ҳаракати хавфсизлиги соҳасидаги ҳуқуқбузарликларни қайд этиб, хат тайёрлаб, уни «Ўзбекистон почтаси» АЖнинг серверига жўнатади. Компьютер томонидан қоидабузар автомобилининг давлат рақами ўқилганда, ҳақиқатан ҳам хатолик юз бериши мумкин. Бундай ҳолатда хат «хато манзилга» жўнатилади. Бу каби ҳолларда ЙҲҚни бузганлиги учун жарима ҳақидаги хатни қабул қилган инсон қарорни жўнатган идорага мурожаат қилганида, қарор шу заҳоти бекор қилинади.
«Озодлик» хабарида Тошкент шаҳар ИИББ ЙҲХБ ходимлари қарордаги хатоликка қарамасдан, жаримани тўлашни талаб этаётганлари ҳақида айтилган.
Маълум қилинишича, ушбу фактни Тошкент шаҳар ИИББга ҳеч қандай алоқаси йўқ. Йўл ҳаракати қоидаларини бузиш факти мурожаат муаллифи томонидан Тошкент вилояти ҳудудида содир этилган. Жарима тўғрисидаги қарор эса Тошкент вилояти Ички ишлар бош бошқармаси томонидан жўнатилган.
Кўриб чиқилаётган ҳолатда ЙҲХКБТ дастурий таъминоти томонидан қоидабузарнинг давлат рақами 01 R 344 VA деб танилган. Ушбу автомобиль эгаси Тошкент вилояти ИИББ ЙҲХБга мурожаат қилганида ва маълумотлар қиёсланганда, Y ва V ҳарфларини аниқлашда компьютер томонидан хатолик юз бергани аниқланган.
2019 йил 18 сентябрь куни Маъмурий жавобгарлик тўғрисидаги кодекснинг 271-моддасига мувофиқ, жарима тўғрисидаги қарор бекор қилинган.
«Ҳурматли электрон ОАВ вакиллари, журналистлар ва блогерлар! Сиздан илтимос: Тошкент шаҳар ИИББ тўғрисида маълумот эълон қилишни режалаштириш вақтида идоранинг матбуот хизматига мурожаат қилиб, маълумотнинг ишончлилигини аниқлаштиринг. Тошкент шаҳар ИИББ ахборот мултимедиа маркази сиз билан ҳамкорлик қилишга, маълумотларни тезкор тарзда текшириб, сизни қизиқтирган саволларга жавоб беришга тайёр», — дейилади хабарда.
Изоҳ (0)