Қорақалпоғистоннинг Мўйноқ туманида 23 сентябрь куни ўтказилган тунги рейд вақтида 13 бош жайронни отиб ўлдирган браконьерлар қўлга олинди, дея хабар бермоқда Ўзбекистон Давлат экология қўмитаси матбуот хизмати.
Тунги рейд Қорақалпоғистон Экология ва атроф-муҳитни муҳофаза қилиш қўмитаси Экология ва атроф-муҳитни муҳофаза қилиш соҳасидаги назорат инспекциясининг «Мўйноқ ҳудудида сув объектларини муҳофаза қилишга ихтисослашган тезкор назорат гуруҳи» ходимлари томонидан ўтказилган.
Тунги соат 3:00 да Мўйноқ тумани «Қозоқдарё» овул фуқаролар йиғинидан оқиб ўтувчи Ақшадарё коллектори атрофида ўтказилган рейд вақтида УАЗ-469 русумли автомобиль тўхтатилиб кўздан кечирилган ва салонида иккита ов милтиғи (ТОЗ-63 ва Иж-18) ва 13 бош жайрон борлиги аниқланган.
Браконьерлар Т.Б. ва П.А. Ўзбекистон Қизил китобига киритилган 13 бош жайронни 22 сентябрь куни соат 15:00—17:00 оралиғида ноқонуний овлаган. «Айни дамда ноқонуний ов бўйича барча ҳужжатлар тўпланиб, Орол табиатни муҳофаза қилиш прокуратурасига юборилмоқда», — дейилади хабарда.
Сентябрь ойи бошида «Қозоқдарё» овул фуқаролар йиғинида жойлашган Акпеткей кўллар тизимида ўтказилган рейд вақтида браконьерлар экоинспекторлар машинасига ўқ узган эди. Кейинроқ ноқонуний ов билан шуғулланиб келган бу фуқароларнинг шахси аниқланиб, уларнинг бари ушланган.
Шунингдек, 3 августда Қорақалпоғистонинг Тахтакўпир туманида уч бош, 25 августга ўтар кечаси Бухоро вилоятининг Қоракўл туманидаги ихтисослаштирилган давлат ўрмон хўжалиги ҳудудида икки бош урғочи жайронни овлаган браконьерлар ушланган эди.
Изоҳ (0)