23-sentabr kuni “Ozodlik” radiosining Facebook’dagi sahifasida “Qoidani buzgan boshqalar, ammo jarima to‘lovi bizdan talab qilinmoqda” nomli post e’lon qilingan edi. Toshkent shahar IIBB matbuot xizmati ushbu ma’lumot haqiqatdan yiroqligini ma’lum qildi.
IIBB ushbu turdagi qoidabuzarliklarni qayd etish tizimining ishlash prinsipini tushuntirib o‘tdi. Yo‘l harakati xavfsizligini kompyuterlashtirilgan boshqarish tizimi (YHXKBT) avtomatlashtirilgan: u yo‘l harakati xavfsizligi sohasidagi huquqbuzarliklarni qayd etib, xat tayyorlab, uni “O‘zbekiston pochtasi” AJning serveriga jo‘natadi. Kompyuter tomonidan qoidabuzar avtomobilining davlat raqami o‘qilganda, haqiqatan ham xatolik yuz berishi mumkin. Bunday holatda xat “xato manzilga” jo‘natiladi. Bu kabi hollarda YHQni buzganligi uchun jarima haqidagi xatni qabul qilgan inson qarorni jo‘natgan idoraga murojaat qilganida, qaror shu zahoti bekor qilinadi.
“Ozodlik” xabarida Toshkent shahar IIBB YHXB xodimlari qarordagi xatolikka qaramasdan, jarimani to‘lashni talab etayotganlari haqida aytilgan.
Ma’lum qilinishicha, ushbu faktni Toshkent shahar IIBBga hech qanday aloqasi yo‘q. Yo‘l harakati qoidalarini buzish fakti murojaat muallifi tomonidan Toshkent viloyati hududida sodir etilgan. Jarima to‘g‘risidagi qaror esa Toshkent viloyati Ichki ishlar bosh boshqarmasi tomonidan jo‘natilgan.
Ko‘rib chiqilayotgan holatda YHXKBT dasturiy ta’minoti tomonidan qoidabuzarning davlat raqami 01 R 344 VA deb tanilgan. Ushbu avtomobil egasi Toshkent viloyati IIBB YHXBga murojaat qilganida va ma’lumotlar qiyoslanganda, Y va V harflarini aniqlashda kompyuter tomonidan xatolik yuz bergani aniqlangan.
2019-yil 18-sentabr kuni Ma’muriy javobgarlik to‘g‘risidagi kodeksning 271-moddasiga muvofiq, jarima to‘g‘risidagi qaror bekor qilingan.
“Hurmatli elektron OAV vakillari, jurnalistlar va blogerlar! Sizdan iltimos: Toshkent shahar IIBB to‘g‘risida ma’lumot e’lon qilishni rejalashtirish vaqtida idoraning matbuot xizmatiga murojaat qilib, ma’lumotning ishonchliligini aniqlashtiring. Toshkent shahar IIBB axborot multimedia markazi siz bilan hamkorlik qilishga, ma’lumotlarni tezkor tarzda tekshirib, sizni qiziqtirgan savollarga javob berishga tayyor”, — deyiladi xabarda.
Izoh (0)