Ижтимоий тармоқларда Андижон вилоятидаги мактабларнинг бирида ўқувчи қиз учинчи қават деразадасидан тушиб кетганлиги ҳақида хабарлар тарқалди. Мазкур ҳолат юзасидан вилоят халқ таълими бошқармаси «Дарё»га расмий маълумот берганди.
Унда келтирилишича, жорий йил 19 сентябрь куни соат 10:30 ларда Избоскан туманидаги 39-давлат ихтисослаштирилган мактаб-интернатининг 11-«А» синф ўқувчиси Исмигул Ғаниева учинчи соат информатика фанидан дарс машғулоти тугаб, танаффус вақтида мактаб биносининг учинчи қаватидаги зинапоя ёнидаги деразада ўтирган ҳолатида эҳтиётсизлиги оқибатида боши айланиб, бахтсиз ҳодиса сабабли тушиб кетган.
Ҳодиса юз берган вақтнинг ўзидаёқ ўқувчи мактабнинг масъул ходимлари томонидан Избоскан туманидаги шошилинч тез тиббий ёрдам бўлимига олиб борилган ва биринчи ёрдам кўрсатилган.Ўқувчи билан ўтказилган суҳбат жараёнида берган оғзаки кўрсатмасига кўра, ҳодиса юз берган вақтда унинг атрофида ҳеч ким бўлмаган, унга нисбатан бошқа шахс томонидан қасд қилинмаган, ўзини жонига қасд қилиш мақсадида бўлмаган, боши айланиб, эҳтиётсизлиги оқибатида тушиб кетган. Ҳозирда унинг саломатлиги яхши.
«Мазкур ҳолат юзасидан қизнинг ота-онаси билан ўтказилган суҳбат натижасида улар томонидан муассаса масъул ходимларига нисбатан ҳеч қандай эътирозлари йўқлиги, ҳақиқатан ҳам фарзандлари И.Ғаниева бахтсиз ҳодиса сабабли мактаб биносининг учинчи қаватидан тушиб кетганлиги, фарзанди муолажа олаётган тиббиёт муассасасида доимий назоратда эканлигини билдирганлар», — дейилган эди хабарда.
Мазкур ҳолатни ўрганиш мақсадида «Дарё» мухбири Избоскан туманида бўлиб, суриштирув олиб борди.
Мактаб директорининг маънавий-маърифий ишлар бўйича ўринбосари Бобур Долимовнинг айтишича, мактаб-интернатида 6-синфдан 11-синфгача 309 нафар ўқувчи она тили ва инглиз тили фанларидан чуқурлаштирилган тартибда таҳсил олади. Муассаса ўқувчилари турли фан олимпиадалари, кўрик-танловлар, спорт мусобақаларида фаол иштирок этиб, фахрли ўринларни эгаллаб келишади. Шу кунларда мактаб жамоаси 5 та ташаббус бўйича тадбирларга тайёргарлик кўраётган экан.
— Ташқарига чиқиб, бино атрофини кўздан кечираётсам, бир пайт 11-синф болалари ҳамширани сўрашди. Нимага кераклигини сўрасам, синфдош қизларидан бири ҳушидан кетиб қолганлигини айтишди. Ҳар бир ўқувчига жавобгар бўлганимиз учун нима бўлганлигини билиш мақсадида болалар айтган жойга кетаётганимда уни дарвоза томонга олиб чиқишаётганди. «Тез ёрдам»ни кутмасдан ўзимиз олиб боришга ҳаракат қилдик. Қизнинг учинчи қаватдан тушиб кетганлигини йўлда билдим. Шошилинчга ташлаб келгандан кейин синфдошлари билан ҳам гаплашдим. Улар воқеа қандай юз берганидан бехабарлигини айтишди. Ушбу ҳолат юзасидан туман прокуратураси ва ички ишлар бўлими томонидан суриштирув ишлари олиб борилмоқда.
«Аслида биринчи қаватда ўқиймиз. Ўша куни жадвалга кўра учинчи соатимиз информатика эди. Информатика хонаси учинчи қаватда жойлашгани учун тепага чиқдик. Дарс кўтаринки кайфиятда ўтди. Ҳаммамиз хурсанд эдик. Танаффусга чиққанимизда Исмигул ўзини ёмон ҳис қилаётганини айтиб, дераза олдига бориб туриб олди. Кейинги дарсга тайёргарлик кўриш учун биз пастга тушиб кетдик, у эса ёлғиз қолди. Ҳеч қанча вақт ўтмасдан шум хабарни эшитдик ва олдига югурдик», — дейди синфдоши Барчиной Умаралиева.
Сайёра Абдулаҳадованинг айтишича, уч йилдан буён ушбу синфга раҳбарлик қилиб келади. 19 нафар ўқувчининг 5 нафари қизлар ҳисобланар экан.
— Ўқувчиларимнинг ҳар бирини доимий назорат қилиб тураман. Ўша куни ҳам дарслар бошланишидан олдин хонага кириб, биттама-битта суҳбат қилганман. Муаммоли вазиятни пайқамагандим. Бундан ташқари, уларнинг ўқишидан ташқари оилавий шароитига ҳам алоҳида эътибор қаратаман. Ота-оналар билан деярли ҳар ҳафта телефон орқали суҳбатлашаман. Чунки оиласида тинчлик ҳукмрон бўлган фарзанднинг билим олиш даражаси ҳам юқори бўлади. Воқеа ҳақида ҳам мен ўқувчиларимдан эшитдим.
«9—11-синфлар ўсмир ёшда эканлигини ҳисобга олиб, улар билан кўпроқ учрашишга, руҳиятини англашга интиламан. Исмигул билан ҳодиса юз беришидан икки кун аввал кўришганман. Ўшанда битиргач, Ўзбекистон давлат жаҳон тиллари университетининг инглиз тили филологияси факультетига топширишини, бунга қаттиқ тайёргарлик кўраётганлигини айтганди. Гапларидан руҳан тушкун ҳолатда эмас, аксинча хурсанд эканлиги маълум эди», — дейди мактаб амалиётчи руҳшуноси Нафисахон Умарова.
Исмигулнинг онаси Гуласал опанинг айтишича, қизи ўзига келганида ҳолат қандай юз бергани ҳақида айтиб берган. Унга кўра, қизи мактабга келишидан олдин тушкун кайфиятда бўлган. Дарс вақтида ўзини ёмон ҳис қилгани туфайли танаффусда зинапоя олдидаги очиқ турган деразага келиб тоза ҳаводан нафас олишга ҳаракат қилган. Шунда орқадан кимдир итариб юборганга ўхшаган. Шундан кейин нима бўлганини эслай олмайди.
— 21 сентябрь куни Республика шошилинч тез тиббий ёрдам маркази вилоят бўлимига ўтказилди. Бугун томография қилдирдик. Лекин дам олиш куни бўлганлиги сабабли шифокорлар келмади. Ҳолати қай даражада эканлигини эртага, яъни душанба куни билиб оламиз», — дейди Гуласал Ҳожиакбарова.
Қизнинг отаси Бахтиёр Ҳожиакбаров эса мактаб мутасаддиларининг эътиборсизлигидан, шунингдек, ҳуқуқни муҳофаза қилувчи органлар ходимлари ушбу ҳодиса юзасидан тергов-суриштирув ишларини олиб бормаётганлигидан норози эканлигини билдирди.
— Хабарни эшитган чоғим туман тез тиббий ёрдам бўлимига югурдим. Аҳволини кўргач, нима бўлганлигини ўрганиш мақсадида мактабга йўл олдим. Борганимда туман прокуратураси ва ички ишлар ходимлари турган экан, киргизишмади. «Ўзимиз ўрганамиз» дейишди. Ҳақиқатан ҳам биринчи куни прокуратурадан одам келди. Ишни ёпиш мақсадида шекилли, ҳужжатларга қўл қўйиб беришимни илтимос қилди, унамадим. Ундан кейин ҳеч кимни учратмадим. Яширишгани билан барибир охирига етишларини талаб қиламан.
Ўтган ўқув йили давомида ўқитувчилари унга нисбатан турли гап-сўзлар, туҳматларни қилиб, диққат қилганини айтганди. Қизим анча-мунчага уйга гап олиб келадиганлардан эмас. Бу йил бундай ҳолатлар бўлган ёки бўлмаганини ҳозирча эшитганим йўқ. Шу сабабли ҳолатни бахтсиз ҳодиса деб тўлақонли тахмин қилолмайман. Қизимни қандай жўнатган бўлсам, шундай соғлом ҳолатда қайтариб беришларини талаб қиламан. Агарда мактабдан ташқарида бўлганида даъвойим бўлмасди, — дейди Бахтиёр Ҳожиакбаров.
Гувоҳ бўлганингиздек, томонларнинг фикри турлича янграмоқда. Қизнинг учинчи қаватдан тушиб кетиши мактаб мутасаддилари айтганидек, бахтсиз ҳодисами ёки ўзи билдираётгандек, кимдир уни итариб юборганми? Ушбу саволларга туман прокуратурасидан якуний жавобни, вилоят соғлиқни сақлаш бошқармасидан эса таҳлил натижаларини кутиб қоламиз.
Изоҳ (0)