БМТнинг судьялар ва адвокатлар мустақиллиги бўйича махсус маърузачиси Диего Гарсия-Саян 19−25 сентябрь кунлари расмий ташриф билан Ўзбекистонда бўлади. Бу ҳақда БМТнинг Тошкентдаги ваколатхонаси маълум қилди, дея хабар беради «Gazeta.uz».
Махсус маърузачининг ташрифидан кўзланган мақсад ҳукумат судья ва адвокатлар мустақиллиги ҳамда юрист касбида эркин фаолият юритилиши соҳасида қабул қилинган чораларни баҳолашдан иборат.
«Ташрифим давомида суд-ҳуқуқ соҳасидаги ислоҳотларнинг судьялар мустақиллиги ва ҳокимиятлар ажратилганлиги каби принципларга мослигини баҳолаш мақсадида ҳукумат билан конструктив мулоқот ўрнатиш ниятидаман, — деди Гарсия-Саян. — Адлия тизими доирасида судьялар, прокурорлар ва адвокатлар ўз касбий фаолиятини эркин олиб бориш имкониятига эга бўлиши ва вазифаларини бажариш чоғида ҳар қандай таҳдид, ишларига аралашув ёки босимдан ҳам қонунда, ҳам амалда муҳофазаланган бўлишлари лозим».
Эксперт 2017 йилда Судьялар Олий кенгаши мустақил, судлар мустақиллигини мустаҳкамлаш ва муҳофаза қилиш борасида кенг ваколатларга эга орган сифатида барпо этилганини маъқуллади ва судьяларни танлаш, лавозимга тайинлаш, малакаларини ошириш ва интизомий чоралар кўриш учун масъул ушбу органнинг салоҳиятини ошириш борасида амалий тавсиялар беришни исташини маълум қилди.
«Шунингдек, юридик касбда мустақил фаолият олиб бориш, хусусан, Адвокатлар уюшмасининг ҳукумат ва бошқа ижроия органларидан мустақил эканлигини таъминловчи ҳуқуқий кафолатлар мавжудлигини ҳам баҳоламоқчиман, — деди Гарсия-Саян.
Ташриф давомида БМТ эксперти ҳукумат ва қонун чиқарувчи ҳокимият расмийлари, шунингдек, судьялар, прокурорлар ва адвокатлар билан учрашади. Шу билан бирга, фуқаролик жамияти вакиллари, олимлар, БМТ агентликлари, донорлар ва дипломатик жамоа билан ҳам учрашади.
Диего Гарсия-Саян хулосалар ва тавсияларни ўз ичига олган тўлиқ маърузани Женевадаги Инсон ҳуқуқлари кенгашига 2020 йил июнь ойида тақдим этади.
Изоҳ (0)