«Биринчи навбатда бу Тошкентга тегишли». Танзила Норбоева тўй маросимлари тўғрисидаги қонун лойиҳасига изоҳ берди

18 сентябрь куни пойтахт ҳокимиятида Халқ депутатлари Тошкент шаҳар Кенгашининг 58-сессияси бўлиб ўтди, деб хабар беради Repost.

Йиғилишда Олий Мажлис Сенати раиси Танзила Норбоева ҳам иштирок этиб, тўй маросимларини ўтказиш борасидаги қонун лойиҳасига изоҳ берди.

Олий Мажлис Сенати ва Қонунчилик палатаси Кенгашларининг йиғилишида тасдиқланган тўй маросимлари ҳақидаги қарор биринчи навбатда Тошкент шаҳрига тегишли. Ушбу тартиб-қоида республикадан кўра, бутун мамлакат учун носоғлом дабдаба ва модага сабаб бўлаётган Тошкент шаҳрига тааллуқли. Тошкент бугун мамлакатнинг юзи ва ойнаси, шу сабабли биз тартиб жорий қилишимиз керак.

Агарда тадбиркор минг кишилик ресторан қурган бўлса, уни меҳмонхонага айлантирсин. Қарорда тўй маросимига таклиф этиладиганлар сони 300 киши деб белгиланган, тамом. Қонун ҳамма учун баробар.

Танзила Норбоева, Олий Мажлис Сенати раиси

Эслатиб ўтамиз, Олий Мажлис Сенати ва Қонунчилик палатаси Кенгашлари 14 сентябрь куни тўй-ҳашамлар, оилавий тантаналар, маърака ва маросимлар, марҳумларнинг хотирасига бағишланган тадбирлар ўтказилишини тартибга солиш тизимини такомиллаштириш тўғрисидаги қарорни қабул қилган эди.

Сенатнинг Ёшлар, маданият ва спорт масалалари қўмитаси раиси Иқбол Мирзаалиев парламент палаталарининг қўшма мажлисида қилган чиқишига кўра, тўй-ҳашамлар, оилавий тантаналар, маърака ва маросимлар, марҳумларнинг хотирасига бағишланган тадбирларни ўтказиш тартиби тўғрисидаги низом 2020 йилнинг 1 январидан кучга киритилади.

Унга кўра оилавий тадбирлар фақат бир кун соат 06:00 ва 23:00 оралиғида ўтказилади. Соат 23:00 дан кейин оилавий тадбирларни давом эттиришга йўл қўйилмайди. Дафн этиш маросими бундан мустасно. Ҳудудларнинг шароитларидан келиб чиқиб, халқ депутатлари туманлар ва шаҳарлар Кенгашлари томонидан ош бериш маросимининг вақти алоҳида белгиланиши мумкин.

Оилавий тадбирларда 200 нафаргача, мазкур тадбирлар муносабати билан ош бериш маросимида 250 нафаргача киши қатнашади. Қўшалоқ тўй-ҳашамларда 250 нафаргача, у билан боғлиқ ош бериш маросимида 300 нафаргача киши қатнашиши мумкин.