Сирдарёда 7 та қотиллик жиноятининг 4 таси яқинларга нисбатан содир этилган. Бу ҳақда Республика маҳаллалар кенгаши ташкиллаган тадбирда маълум қилинди

Сирдарё туманида Республика маҳаллалар кенгаши томонидан Ички ишлар вазирлиги ва «Нуроний» жамғармаси билан ҳамкорликда «Маҳаллаларда ижтимоий-маънавий муҳитни барқарорлаштириш, жиноятчилик ва ҳуқуқбузарликларнинг олдини олишда кекса авлод вакилларининг ўрни» мавзусида семинар ўтказилди. Бу ҳақда «Дарё»га тадбир ташкилотчилари маълум қилди.

Семинар давомида вилоят, жумладан, Сирдарё туманидаги оилалар ва маҳаллаларда тинчлик ва хотиржамлик муҳитига раҳна солиб турган жиноятчилик, оилавий ажрим, ўз жонига қасд ва суиқасд қилиш каби ҳолатларнинг амалдаги ҳолати муҳокама қилиниб, профилактик тадбирларни амалга оширишда давлат ва жамоат ташкилотлари олдида турган муҳим вазифалар кўриб чиқилди.

Қайд этилганидек, туманда жорий йилнинг 8 ойи давомида барча йўналишдаги жиноятлар 28,4 фоизга ва жиноят қидирув йўналишида 32,5 фоизга камайган. Бироқ, ўта оғир жиноятлар 7,1, оғир турдаги жиноятлар 7,5, қасддан баданга оғир шикаст етказиш 8, қасддан баданга ўртача оғир шикаст етказиш 100 ва қасддан баданга енгил шикаст етказиш 44,4 фоизга кўпайган.

Жиноятларда иштирок этган шахслар бўйича таҳлил қилинганида, илгари судланган шахслар томонидан 57 та, вояга етмаганлар томонидан 10, ёшлар томонидан 136 ва аёллар томонидан 61 та жиноят содир этилганлиги кузатилган.

Сирдарё туманида 38 та маҳалланинг 27 тасида ёки 71,0 фоизида жиноятлар содир этилишига йўл қўйилган, 9 тасида ёки 23,7 фоизида жиноятлар сони ортиб кетган. Шунингдек, Сирдарё вилоятида мавжуд 222 та маҳалланинг 134 тасида ёки 60,3 фоизида жиноятлар содир этилишига йўл қўйилган бўлса, 48 тасида ёки 21,6 фоизида жиноятлар сони ортиб кетган.

Оила-турмуш муносабатлари доирасида содир этилаётган мудҳиш оғир ва ўта оғир турдаги жиноятлар салмоғи юқорилигича қолмоқда. Жумладан, Сирдарё вилоятида 7 та қотиллик жиноятининг 4 таси яқинларга нисбатан содир этилган. Ушбу қотиллик жиноятлари Гулистон шаҳридаги «Обод юрт», Янгиер шаҳридаги «Наврўзобод», Сайхунобод туманидаги «Иттифоқ» ва Мирзаобод туманидаги «Боғистон» маҳаллаларида рўй берган.

Тадбир давомида бундай нохуш ҳолатларнинг юзага келиш сабаблари батафсил кўриб чиқилди ва келгусида уларнинг олдини олиш юзасидан вазифалар белгилаб олинди.