Sirdaryo tumanida Respublika mahallalar kengashi tomonidan Ichki ishlar vazirligi va “Nuroniy” jamg‘armasi bilan hamkorlikda “Mahallalarda ijtimoiy-ma’naviy muhitni barqarorlashtirish, jinoyatchilik va huquqbuzarliklarning oldini olishda keksa avlod vakillarining o‘rni” mavzusida seminar o‘tkazildi. Bu haqda “Daryo”ga tadbir tashkilotchilari ma’lum qildi.
Seminar davomida viloyat, jumladan, Sirdaryo tumanidagi oilalar va mahallalarda tinchlik va xotirjamlik muhitiga rahna solib turgan jinoyatchilik, oilaviy ajrim, o‘z joniga qasd va suiqasd qilish kabi holatlarning amaldagi holati muhokama qilinib, profilaktik tadbirlarni amalga oshirishda davlat va jamoat tashkilotlari oldida turgan muhim vazifalar ko‘rib chiqildi.
Qayd etilganidek, tumanda joriy yilning 8 oyi davomida barcha yo‘nalishdagi jinoyatlar 28,4 foizga va jinoyat qidiruv yo‘nalishida 32,5 foizga kamaygan. Biroq, o‘ta og‘ir jinoyatlar 7,1, og‘ir turdagi jinoyatlar 7,5, qasddan badanga og‘ir shikast yetkazish 8, qasddan badanga o‘rtacha og‘ir shikast yetkazish 100 va qasddan badanga yengil shikast yetkazish 44,4 foizga ko‘paygan.
Jinoyatlarda ishtirok etgan shaxslar bo‘yicha tahlil qilinganida, ilgari sudlangan shaxslar tomonidan 57 ta, voyaga yetmaganlar tomonidan 10, yoshlar tomonidan 136 va ayollar tomonidan 61 ta jinoyat sodir etilganligi kuzatilgan.
Sirdaryo tumanida 38 ta mahallaning 27 tasida yoki 71,0 foizida jinoyatlar sodir etilishiga yo‘l qo‘yilgan, 9 tasida yoki 23,7 foizida jinoyatlar soni ortib ketgan. Shuningdek, Sirdaryo viloyatida mavjud 222 ta mahallaning 134 tasida yoki 60,3 foizida jinoyatlar sodir etilishiga yo‘l qo‘yilgan bo‘lsa, 48 tasida yoki 21,6 foizida jinoyatlar soni ortib ketgan.
Oila-turmush munosabatlari doirasida sodir etilayotgan mudhish og‘ir va o‘ta og‘ir turdagi jinoyatlar salmog‘i yuqoriligicha qolmoqda. Jumladan, Sirdaryo viloyatida 7 ta qotillik jinoyatining 4 tasi yaqinlarga nisbatan sodir etilgan. Ushbu qotillik jinoyatlari Guliston shahridagi “Obod yurt”, Yangiyer shahridagi “Navro‘zobod”, Sayxunobod tumanidagi “Ittifoq” va Mirzaobod tumanidagi “Bog‘iston” mahallalarida ro‘y bergan.
Tadbir davomida bunday noxush holatlarning yuzaga kelish sabablari batafsil ko‘rib chiqildi va kelgusida ularning oldini olish yuzasidan vazifalar belgilab olindi.
Izoh (0)