Аҳадбек Ҳайдаров ва Абдумухтор Эргашев Ўзбекистон молия вазири ўринбосарлари этиб тайинланди

Ўзбекистон молия вазирининг янги ўринбосарлари тайинланди. Бу ҳақда вазирлик матбуот хизмати хабар бермоқда.

2019 йилнинг апрель ойидан буён Давлат активларини бошқариш агентлигига раҳбарлик қилиб келаётган Аҳадбек Ҳайдаров молия вазирининг давлат бюджети ва халқаро молиявий муносабатлар масалалари бўйича ўринбосари этиб тайинланган. Ҳайдаров ушбу лавозимда Молия вазирлиги ҳузуридаги Бюджетдан ташқари пенсия жамғармаси ижрочи директори этиб тайинланган Баҳром Ашрафхоновнинг ўрнини эгаллаган.

Шунингдек, 2018 йилдан буён қишлоқ хўжалиги вазири ўринбосари сифатида ишлаб келган Абдумухтор Эргашев молия вазирининг агросаноат мажмуаси масалалари бўйича ўринбосари лавозимида иш бошлаган.

Маълумот учун, Аҳадбек Ҳайдаров (1971 йилда туғилган) 1994 йилда Ўзбекистон Миллий университетини тамомлаган. 2017—2019 йилларда молия вазирининг биринчи ўринбосари лавозимида ишлаган. Турли йилларда Ўзбекистон Миллий банки раисининг биринчи ўринбосари ва «Микрокредитбанк» раҳбари сифатида фаолият кўрсатган.

Абдумухтор Эргашев (1977 йилда туғилган) 2000 йилда Термиз давлат университетини тамомлаган, 2004 йилда Тошкент давлат иқтисодиёт университетини, 2009 йилда эса Президент ҳузуридаги Давлат бошқаруви академиясини тамомлаган. У 2010—2018 йилларда Вазирлар Маҳкамаси тизимида, 2017—2018 йилларда эса Қишлоқ хўжалиги вазирлиги тизимида ишлаган.