Ҳукуматнинг 17 сентябрдаги қарори билан Баҳром Ашрафхонов Молия вазирлиги ҳузуридаги бюджетдан ташқари Пенсия жамғармасининг ижро этувчи директори этиб тайинланди. Бу ҳақда Адлия вазирлигининг Telegram’даги «Ҳуқуқий ахборот» каналида хабар берилган.
Баҳром Ашрафхонов (1968 йилда туғилган) — Тошкент давлат иқтисодиёт университетини «Халқаро валюта-кредит муносабатлари» мутахассислиги бўйича тамомлаган (1993 йил). 1993—1994 йилларда Кентукки университети (АҚШ)да таҳсил олган. Ашрафхонов 2007—2016 йилларда Ўзбекистон молия вазири ўринбосари — Ғазначилик бошлиғи бўлиб ишлаган.
2005—2007 йилларда молия вазирининг биринчи ўринбосари, 2004—2005 йилларда молия вазири ўринбосари, 2002—2004 йилларда молия вазири ўринбосари — Давлат суғурта назорати инспекцияси бошлиғи, 2000—2002 йилларда мазкур инспекция бошлиғининг биринчи ўринбосари, 1998—2000 йилларда UzAIG Ўзбекистон—АҚШ суғурта компанияси бош менежери, 1994—1998 йилларда эса AIG Trading Group’нинг Марказий Осиёдаги вакили сифатида фаолият кўрсатган.
Ашрафхонов 2016—2018 йилларда Ўзбекистоннинг Россиядаги элчиси сифатида фаолият олиб борган. 2018 йил сентябридан 2019 йил февралига қадар «Ўзбекнефтгаз» холдинг компанияси бошқаруви раиси вазифасини бажарувчи сифатида ишлаган Ашрафхонов ҳозирга қадар Ўзбекистон молия вазири ўринбосари сифатида ишлаб келаётган эди.
Маълумот учун, қонун ҳужжатларида белгиланган тартибда фуқароларнинг давлат пенсия таъминотини ташкил этиш, фуқароларга пенсиялар, ижтимоий нафақалар, компенсация тўловлари ва бошқа тўловларни тайинлаш, пенсиялар ва бошқа тўловлар миқдорларининг қайта ҳисоблаб чиқилишини таъминлаш Молия вазирлиги ҳузуридаги бюджетдан ташқари Пенсия жамғармасининг асосий вазифаларидан биридир.
Изоҳ (0)