Жанубий Корея Миллий мудофаа университети ўқитувчилари Ўзбекистон Қуролли Кучлари академиясига ташриф буюрди

Жанубий Корея Миллий мудофаа университети делегацияси Ўзбекистон Қуролли Кучлари академиясига ташриф буюрди. Делегацияга университет декани профессор Квон Те-Вук бошчилик қилди. Бу ҳақда Мудофаа вазирлиги Ахборот ва оммавий коммуникациялар департаменти «Дарё»га маълум қилди.

Қуролли Кучлар академияси бошлиғининг ўринбосари полковник Руфтулло Неъматов учрашув давомида икки мамлакатнинг узоқ вақт давомида синалган стратегик ҳамкор эканлигини таъкидлаб ўтди. Икки мамлакат раҳбарларининг юқори даражадаги тизимли алоқалари Ўзбекистон — Корея Республикаси ўртасидаги ҳарбий муносабатларни янги даражага олиб чиқди.

Мазкур йўналишда Қуролли Кучлар академияси ва Жанубий Корея Миллий мудофаа университети ўртасида имзоланган меморандум алоҳида аҳамият касб этди. Ўзбекистон Мудофаа вазирлигининг 20 нафардан ортиқ офицерлари турли йўналишларда тажриба алмашиш мақсадида Жанубий Корея Қуролли Кучларининг ҳарбий таълим муассасаларида тайёргарлик ўтаб қайтди.

Тадбир якунида Жанубий Корея Миллий мудофаа университети ўқитувчилари академияда яратилган шароитлар, унинг инфратузилмаси билан яқинда танишиб, ўқув хоналарида курсантлар билан суҳбатлашди.

Эслатиб ўтамиз, жорий йилнинг 4—6 сентябрь кунлари Ўзбекистон мудофаа вазирининг тарбиявий ва мафкуравий ишлар бўйича ўринбосари генерал майор Азизбек Икромов бошчилигидаги Мудофаа вазирлиги ҳарбий делегацияси хавфсизлик ва мудофаа масалалари бўйича Жанубий Кореяда ўтказилган «Сеул мулоқоти—2019» форумида иштирок этган эди. Тадбирлар давомида генерал майор Азизбек Икромов Корея Республикаси Миллий мудофаа вазири ўринбосари Пак Чже Мин билан икки томонлама учрашув ўтказган.