Инновацион ривожланиш вазирининг ўринбосари Азимжон Назаров Ўзбекистон бош вазирининг ўринбосари Элёр Ғаниев бошчилигида София шаҳрида бўлиб ўтган иқтисодий ва илмий-техникавий ҳамкорлик бўйича Болгария—Ўзбекистон ҳукуматлараро комиссиясининг бешинчи сессияси доирасида ҳукумат делегацияси таркибида иштирок этди. Бу ҳақда Инновацион ривожланиш вазирлиги хабар берди.
Ўзбекистон бош вазирининг инвестициялар ва ташқи иқтисодий алоқалар масалалари бўйича ўринбосари Элёр Ғаниев савдо соҳасида амалга оширилмаган салоҳиятга эътибор қаратди ва Ўзбекистон Болгариядан фармацевтика, кимё саноати, технология, қишлоқ хўжалиги соҳаларида юқори сифатли маҳсулотларни импорт қилишдан манфаатдор эканини таъкидлади. Болгария ва Ўзбекистон ўртасидаги товар алмашинуви сўнгги йилларда ўсиб бормоқда, 2018 йилда эса 2017 йилга нисбатан 1,3 фоизга ошди ва 20 миллион АҚШ долларига етди.
Ташриф давомида Болгария илмий-техник ва бизнес доиралари вакиллари билан икки томонлама ҳамкорликни кенгайтириш ва илмий-техник соҳадаги ҳамкорлик масалаларини муҳокама қилиш бўйича учрашувлар ва музокаралар ўтказилди.
Болгария фанлар академияси (БАН) қошидаги қўшма инновация маркази директори Марин Пандев билан учрашув доирасида ҳар бир томонни ўз қисми бўйича молиялаштириш режалаштирилган қўшма илмий лойиҳаларни амалга ошириш имкониятлари муҳокама қилинди. Болгария томонига ўзбек олимлари учун амалиёт курсларини ташкил этиш масаласини кўриб чиқиш таклиф қилинди.
Болгариянинг кичик ва ўрта корхоналарни қўллаб-қувватлаш агентлиги ижрочи директори ўринбосари Яна Топалова билан музокаралар чоғида фикр алмашилди, инновацион экотизимни ривожлантириш ғоялари муҳокама қилинди. Таъкидлаш жоизки, агентлик қошида Болгарияда илмий-тадқиқот ва тажриба-конструкторлик фаолиятини рағбатлантириш учун масъул бўлган Болгария Миллий инновацион жамғармаси фаолият юритади. Томонлар Болгария Миллий инновацион жамғармаси ҳамда Инновацион ривожланиш ва новаторлик ғояларини қўллаб-қувватлаш жамғармаси ўртасида тажриба алмашиш ва қўшма илмий-тадқиқот фаолиятини амалга ошириш бўйича ҳамкорликни йўлга қўйишдан манфаатдор эканликларини билдирди.
Азимжон Назаров агентлик раҳбариятини октябрь ойининг охирида бўладиган «INNOWEEK 2019» — инновацион ғоялар ҳафталигида иштирок этиш учун Тошкентга таклиф қилди.
Изоҳ (0)