Innovatsion rivojlanish vazirining o‘rinbosari Azimjon Nazarov O‘zbekiston bosh vazirining o‘rinbosari Elyor G‘aniyev boshchiligida Sofiya shahrida bo‘lib o‘tgan iqtisodiy va ilmiy-texnikaviy hamkorlik bo‘yicha Bolgariya—O‘zbekiston hukumatlararo komissiyasining beshinchi sessiyasi doirasida hukumat delegatsiyasi tarkibida ishtirok etdi. Bu haqda Innovatsion rivojlanish vazirligi xabar berdi.
O‘zbekiston bosh vazirining investitsiyalar va tashqi iqtisodiy aloqalar masalalari bo‘yicha o‘rinbosari Elyor G‘aniyev savdo sohasida amalga oshirilmagan salohiyatga e’tibor qaratdi va O‘zbekiston Bolgariyadan farmatsevtika, kimyo sanoati, texnologiya, qishloq xo‘jaligi sohalarida yuqori sifatli mahsulotlarni import qilishdan manfaatdor ekanini ta’kidladi. Bolgariya va O‘zbekiston o‘rtasidagi tovar almashinuvi so‘nggi yillarda o‘sib bormoqda, 2018-yilda esa 2017-yilga nisbatan 1,3 foizga oshdi va 20 million AQSh dollariga yetdi.
Tashrif davomida Bolgariya ilmiy-texnik va biznes doiralari vakillari bilan ikki tomonlama hamkorlikni kengaytirish va ilmiy-texnik sohadagi hamkorlik masalalarini muhokama qilish bo‘yicha uchrashuvlar va muzokaralar o‘tkazildi.
Innovatsion rivojlanish vaziri o‘rinbosari A. Nazarov Bolgariya fanlar akademiyasi (BAN) qoshidagi qo‘shma innovatsiya markazi direktori Marin Pandev bilan uchrashuv doirasida har bir tomonni o‘z qismi bo‘yicha moliyalashtirish rejalashtirilgan qo‘shma ilmiy loyihalarni amalga oshirish imkoniyatlari muhokama qilindi. Bolgariya tomoniga o‘zbek olimlari uchun amaliyot kurslarini tashkil etish masalasini ko‘rib chiqish taklif qilindi.
Bolgariyaning kichik va o‘rta korxonalarni qo‘llab-quvvatlash agentligi ijrochi direktori o‘rinbosari Yana Topalova bilan muzokaralar chog‘ida fikr almashildi, innovatsion ekotizimni rivojlantirish g‘oyalari muhokama qilindi. Ta’kidlash joizki, agentlik qoshida Bolgariyada ilmiy-tadqiqot va tajriba-konstruktorlik faoliyatini rag‘batlantirish uchun mas’ul bo‘lgan Bolgariya Milliy innovatsion jamg‘armasi faoliyat yuritadi. Tomonlar Bolgariya Milliy innovatsion jamg‘armasi hamda Innovatsion rivojlanish va novatorlik g‘oyalarini qo‘llab-quvvatlash jamg‘armasi o‘rtasida tajriba almashish va qo‘shma ilmiy-tadqiqot faoliyatini amalga oshirish bo‘yicha hamkorlikni yo‘lga qo‘yishdan manfaatdor ekanliklarini bildirdi.
Azimjon Nazarov agentlik rahbariyatini oktabr oyining oxirida bo‘ladigan “INNOWEEK 2019” — innovatsion g‘oyalar haftaligida ishtirok etish uchun Toshkentga taklif qildi.
Izoh (0)