16 сентябрь, душанба куни Бешариқ туманида «Марказ—2019» халқаро ўқув-машғулотида қатнашиш учун Ўзбекисонга ташриф буюрган тожикистонлик ҳарбийлар кутиб олинди. Бу ҳақда Мудофаа вазирлиги Ахборот ва оммавий коммуникациялар департаменти хабар берди.
Тантанали маросимдан сўнг тожикистонлик ҳарбий хизматчилар Наманган вилоятида жойлашган «Ғурумсарой» дала-ўқув майдонига етиб келди ва машғулотларга тайёргарликни бошлаб юборди.
Куннинг иккинчи ярмида ўзбекистонлик ва тожикистонлик ҳарбийлар иштирокида брифинг ташкиллаштирилиб, Мудофаа вазирлиги масъул офицерлари «Марказ—2019» ўқув-машғулотларининг тартиби ҳамда ундан кўзланган мақсадни меҳмонларга етказди.
17 сентябрь, сешанба куни «Ғурумсарой» дала-ўқув майдонида Ўзбекистон ва Тожикистон ҳарбийлари иштирокидаги стратегик қўмондонлик штаб машғулотлари доирасидан ўрин олган «Марказ—2019» ўқувига старт берилди.
Очилиш маросимида сўзга чиққан Ўзбекистон мудофаа вазирининг биринчи ўринбосари, Қуролли Кучлар Бош штаби бошлиғи генерал майор Павел Эргашев ушбу ўқув машғулотлари икки давлат ўртасидаги ҳарбий муносабатларнинг мустаҳкамланишига ҳамда жангавор тайёргарликни оширишда муҳим ўрин тутишини таъкидлаб, ўқув-машғулотларида иштирок этаётган ўзбек ва тожик ҳарбийларига муваффақият тилади.
Тожикистон Қуруқликдаги қўшинлар қўмондонининг биринчи ўринбосари генерал майор Ихтиёр Охунзода Неъматулло ҳам «Ғурумсарой» полигонида ташкиллаштирилаётган «Марказ—2019» ўқув-машғулотларининг Ўзбекистон ва Тожикистон ҳарбийларининг ҳамкорлигида ташланган навбатдаги қадам бўлишини айтиб, тадбир ташкилотчиларига дўстона кутиб олиш тадбирлари учун ўз миннатдорчилигини билдирди.
Изоҳ (0)