БМТнинг Ўзбекистондаги жамоаси Вазирлар Маҳкамаси билан ҳамкорликда аҳолининг заиф қатламларини ижтимоий ҳимоя қилиш тизимини яхшилаш бўйича қўшма дастурни ишлаб чиқди. Бу ҳақда UNICEF ваколатхонаси маълум қилди, дея хабар беради «Gazeta.uz».
Дастур 17 сентябрь куни Тошкентда тақдим этилди. Тадбирда бош вазир ўринбосари Азиз Абдуҳакимов ҳамда БМТнинг Ўзбекистондаги доимий координатори Ҳелена Фрезер иштирок этди.Дастур асосан ногиронлиги бўлган одамлар учун институционал ислоҳотлар ҳамда синов дастурлари амалга оширишни кўзда тутади. Ижтимоий ҳимоя тизими ижтимоий таъминот, жумладан, нафақа ва ижтимоий суғурталаш, болалар ва катталар учун ижтимоий хизматларни ўз ичига олган ижтимоий хизматлар ва ишлар тизимидан иборат бўлиши кутилмоқда.
Ўзбекистонда ижтимоий ҳимоя учун масъул бўлган вазирлик ташкил этиш ҳақидаги хабарлар май ойида тарқалганди. Эндиликда эса 2022 йилда мамлакатда аҳоли эҳтиёжларига мос самарали ижтимоий ҳимоя учун етарлича ресурслари бўлган ягона маҳкама ташкил этилиши маълум бўлди. 2021 йилгача эса 2030 йилгача Барқарор ривожланиш соҳасидаги кун тартибига асосланган Миллий ижтимоий ҳимоя стратегиясини ишлаб чиқиш ва тасдиқлаш режалаштирилмоқда.
Ўзбекистон Барқарор ривожланиш мақсадлари Жамғармасининг молиявий кўмагини олиш тўғрисидаги аризаси тасдиқланган 24 давлатдан бирига айланди. Ушбу жамғарма маблағлари Барқарор ривожланиш мақсадларига эришиш жараёнини тезлаштириш учун мўлжалланган.
Ҳозирда Ўзбекистонда ижтимоий ҳимоя қилиш вазифаси бир қанча вазирлик ва идоралар ўртасида тақсимланган. Мамлакат ЯИМнинг 8−9 фоизга яқинини ижтимоий ҳимояга сарфлаётган бўлишига қарамасдан, сўнгги йилларда ижтимоий ҳимоя тизимида бўшлиқ ортмоқда, дея қайд этади UNICEF.
«Аксарият ногиронлиги бўлган шахслар муносиб ижтимоий ҳимояга эга эмас. Ижтимоий нафақалар миқдори кескин қисқарди, бир вақтнинг ўзида болали заиф оилалар ўртасида қамраб олиш даражаси 25 фоизгача тушди. Эҳтиёжмандларнинг фақатгина 10 фоизи ижтимоий нафақалар ва меҳнат бозоридаги фаол дастурлардан фойдалана олади, пенсия ёшидаги шахсларнинг 30 фоизи ижтимоий суғурталаш дастурларига жалб қилинмаган», — дейилади хабарда.
Изоҳ (0)