АҚШ президенти Дональд Трамп дронлар томонидан Саудия Арабистонидаги Saudi Aramco нефтни қайта ишлаш заводига уюштирилган ҳужумдан сўнг, нефть бозоридаги вазиятни барқарорлаштириш учун мамлакат нефть захираларидан фойдаланиш бўйича топшириқ берганини маълум қилди, деб хабар беради «Коммерсантъ».
Трампнинг сўзларига кўра, АҚШ ҳужум ортида ким турганини билади, бироқ Ар-Риёднинг мазкур нохуш ҳодисага кимларнинг алоқадор эканлиги бўйича фикрини кутмоқда.
«Саудия Арабистонда уюштирилган ҳужум нефть нархига таъсир кўрсатиши мумкинлиги сабаб, бозорни барқарорлаштириш учун мен стратегик нефть захираларидан фойдаланишга санкция бердим», — деб ёзади Трамп ўзининг Twitter’даги саҳифасига. Унинг таъкидлашича, АҚШ дронлар ҳужумига жавоб қайтаришга тайёр, бироқ ҳозирда қиролликдан тахминий айбдорлар борасида маълумот кутмоқда. «Биз тўлиқ жанговар шай ҳолатдамиз, барчаси тасдиқланишига боғлиқ», — дейди Трамп.
The Washington Post газетасининг ёзишича, Трамп администрацияси ҳақиқатан ҳужумга тайёргарлик кўрмоқда. 15 сентябрь куни Дональд Трамп АҚШ мудофаа вазири Марк Эспер билан учрашган. Учрашув тафсилотлари ҳақида ҳозирча маълумот йўқ.
Эслатиб ўтамиз, 14 сентябрь куни Saudi Aramco нефть компаниясининг икки объектига дронлар ҳужум қилган эди. Бунда гап катталиги бўйича мамлакатда иккинчи ўринда турувчи Хураис кони ва Абкаик конидаги нефтни қайта ишлаш заводи ҳақида бормоқда. Saudi Aramco уни нефтни ташиш учун барқарорлаштириш бўйича жаҳондаги энг йирик завод деб атайди, шунингдек, у компаниянинг нефтни қайта ишлаш бўйича йирик заводларидан бири ҳамдир. У ерда бир кеча-кундузда етти миллион баррелгача нефтни қайта ишлаш мумкин.
Saudi Aramco дунёда энг йирик заводлардан бири ҳисобланувчи Абкаикдаги нефтни қайта ишлаш заводи бир суткада 7 миллион тонна баррелгача хом ашёни қайта ишлаши мумкин. 2006 йилда заводга «Ал-Қоида» террорчилик ташкилотининг худкушлари ҳужум қилган бўлиб, у муваффақиятсиз якунланган.
Изоҳ (0)