Бухоро давлат университетида ташкил этилган янги Агрономия ва биотехнология факультетининг янги бинога кўчирилиши кўплаб талабаларнинг норозилиги ва эътирозига сабаб бўлди.
Янги ўқув йили бошиданоқ у ерда зарур шарт-шароитларнинг йўқлиги ҳақидаги эътирозлар ижтимоий тармоқлар фойдаланувчиларининг диққатини жалб этди. Исми-шарифи очиқланишини истамаган бир гуруҳ талабалар «Дарё»га мурожаатида янги ўқув биносида шароитлар мавжуд эмаслиги, жумладан, ошхона, ҳожатхона, спорт зали йўқлиги, лаборатория хонаси жиҳозланмагани, устига-устак, қатнов учун масофа узоқлигини билдирган.
Маълумотга кўра, Олий ва ўрта махсус таълим вазирининг 2019 йил 10 июндаги 513-сонли буйруғи билан (Вазирлар Маҳкамасининг 29 майдаги 14/1-1074-сонли топшириғи ижросини таъминлаш мақсадида) Бухоро давлат университетида «Биология» ва «Тупроқшунослик» йўналишлари негизида Агрономия ва биотехнология қўшма дастурлар факультети ташкил этилган.
Бухоро вилояти ҳокимлиги кўрсатмаси ҳамда вазирликнинг 2019 йил 29 августдаги 773-сонли буйруғи билан Бухоро туманидаги «Работиқалмоқ» қишлоғи, Янгиобод кўчасида жойлашган Саноат касб-ҳунар коллежи биноси университет тасарруфига ўтказилган. Мазкур факультетда истиқболда агрономия, биотехнология, агрокимё ва агротупроқшунослик, қишлоқ хўжалиги маҳсулотларини сақлаш ва дастлабки ишлаш технологияси, агрологистика, агробизнес, ўсимликлар ҳимояси ва карантини таълим йўналишлари бўйича хорижий олий таълим муассасалари билан ҳамкорликда қўшма таълим дастурлари асосида кадрлар тайёрланади.
Ушбу янги факультетда «Биология» (турлари бўйича) ва «Тупроқшунослик» таълим йўналишлари бўйича ўқиётган талабалар ўз йўналишлари бўйича ўқишни давом эттириб, белгиланган намунадаги бакалаврлик дипломига эга бўлади.
Билдирилишича, Бухоро давлат университети талабалари контингенти жорий ўқув йилида салкам 14 мингга етган. Келгуси йилда муассаса талабалари сони 20 минг нафарни, 2030 йилларга бориб эса 40 минг нафарни ташкил этиши кутиляпти. Университет эса бор-йўғи 6 мингдан ортиқроқ талабага мослаштирилган ва яқин йилларгача кўпи билан 7-8 минг талаба 2 сменада ўқитиб келинган.
— Дунё амалиётида ҳам университетлар одатда бир жойда жойлашмаганлигини кўришимиз мумкин. Жаҳоннинг кўпгина машҳур университетлари кампуслар кўринишида шаҳар ташқарисида жойлашганлиги одатий ҳол. Талабалар томонидан қўйилаётган талаблар эса университет имкониятига тўғри келмайди. Таълим жараёнлари 2 сменада олиб борилаётганига қарамай, ўз-ўзидан жой масаласи танқис. Айни кунда университетимизда таълим жараёнлари 7 та манзилда олиб борилмоқда. Жумладан, жорий ўқув йилида шаҳар ва унинг атрофида жойлашган, илгари касб-ҳунар коллежлари бинолари ва бошқа мақсадларда ишлатилган 3 та ўқув биноси университет тасарруфига ўтказилди. Ҳозирда уларда ўқиш ва таълим учун барча шароитлар бор. — дейди университет ректори, профессор Обиджон Ҳамидов. — Ҳозирда Агрономия ва биотехнология факультети жойлашган илгариги Бухоро туман Саноат касб-ҳунар коллежига қатновни яхшилаш учун вилоят ҳокимлиги ҳамда вилоят йўл-транспорт департаменти билан келишилган ҳолда 2 та йўналишли автобуслар хизмати йўлга қўйилди. У ерда университетнинг бошқа биноларидан кам бўлмаган имконият ва шароитларни яратиш учун барча имкониятларни ишга соляпмиз.
Агрономия ва биотехнология факультети учун унинг таълим йўналиши қишлоқ хўжалиги соҳасига мувофиқлаштирилгани сабабли вилоятнинг қишлоқ хўжалиги тармоғи энг яхши ривожланган ҳудуд — университет бош биносидан 10,5 километр, шаҳар ҳалқа йўлидан 3 километр масофада жойлашган таълим муассасаси танланган.
— Шаҳар марказидан ўқишга қатнашимиз учун автобуслар етишмайди. Баъзида ҳатто иккита транспорт алмаштиришимизга тўғри келяпти. 10,5 километр нарида таҳсил олиб, яна шунча километр йўл босиб, ётоқхонага қайтиш ҳам пул билан, ҳам вақт билан боғлиқ муаммоларни келтириб чиқаряпти. Бош корпусда турли хориж тиллари тўгаракларига қатнардик. Афсуски, масофа оралиғи бизнинг қўшимча сабоқларимиз вақтини ўтказиб юборишимизга сабаб бўляпти. Бир кунда 20-25 минг сўм сарфлашимизга тўғри келяпти. Бундан ташқари, ошхона кичик, буям етмагандай, овқатлар сифати ҳам талабга жавоб бермайди, — дейди талабалар.
«Дарё» мухбири томонидан ҳолат ўрганилар экан, янги ўқув биносида моддий-техник база мустаҳкамлангани, мавжуд ошхона ёнида қўшимча равишда енгил конструцияли 70 ўринга мўлжалланган ошхона тиклангани, кутубхона ва буфет хизмати борлиги ва айни пайтда ёпиқ қишки ошхона тиклаш ишлари бажарилаётганига ойдинлик киритилди.
«Бухоро туманидаги саноат касб-ҳунар коллежи биноси ўқув жараёнларини олиб боришда ҳеч қандай талабга жавоб бермайди. Маърузаларни фаоллар зали ёки коллеж спорт майдончасида тикка турган ҳолда ўтказамиз. Ўқув хонасининг шундоқ ёнида ошхона, овқат ҳиди ўқув хоналари ҳавосини бузиб туради. Лаборатория машғулотларини ўтказиш учун ҳам анжомлар йўқ. Муаммоларни ечсангиз, 500 нафардан ортиқ талабанинг оғирини енгил қилган бўлардингиз», — дейилади мурожаатда.
Янги бино интернет тармоғига уланган, ўқув аудиториялари ва бошқа хоналарни ўзаро ички локал компьютер тармоғига бирлаштириш ишлари давом эттирилмоқда, тиббиёт пункти ва спорт залини жиҳозлаш бўйича амалий ишлар бошланган. Бироқ, спорт майдончаси таъмирталаб: инвентарлар йўқ, мавжудлари ҳам фойдаланишга яроқсиз.
— Албатта, камчиликлар йўқ эмас, бор. Аммо янги жой, янги маскан. Ўн кун ичида шунча натижага эришдик. Узоғи билан яна бир ҳафта ёки ўн кун ичида қишлоқ ичидаги ушбу таълим муассасаси ҳам шаҳар марказидаги билимгоҳдан қолишмайдиган имкониятларга эга бўлади. Кўриб турганингиздек, ўқув биноси шинам ва замонавий. Ушбу бинога кўчиб келганимизда уни алоҳида ремонт қилишга ҳожат йўқ эди. Агрономия ва биотехнология факультетида таълим жараёнлари бевосита кўпроқ амалиётга қаратилгани боис, янги ўқув йилининг тўртинчи куниёқ илгариги ўқув биноларидан биология ва кимё ўқув лабораториялари кўчириб келинди. Ушбу лабораторияларда хорижий фондлар ҳисобидан қиймати 300 минг еврога тенг замонавий жиҳозлар мавжуд. Аммо талабаларга дастлаб 15 кун-бир ой давомида назарий билимлар берилиши, кейин эса лаборатория машғулотларини ўтказиш кўзда тутилгани учун улар лаборатория хоналари ва жиҳозлари йўқ, деб ўйлашган бўлиши мумкин, — деди факультет декани Аббос Қодиров.
Шу куни янги ташкил этилган факультет фаоллар залида университет ректори ҳамда талаба-ёшлар учрашуви ўтказилди. Унда Бухоро шаҳар марказига яқин — 10,5 километр масофага кўчирилган манзилга қатновчи йўналишли автобуслар сонини ошириш, ўқув биноси олдидан кесиб ўтувчи йўл икки ёнида замонавий кўринишга эга бекатлар барпо этиш, шунингдек, талабаларнинг таклиф ва талабларига кўра, бир неча кун ичида хориж тиллари тўгаракларини очиш ишлари амалга оширилиши маълум қилинди.
Изоҳ (0)