Ўзбекистон ташқи ишлар вазирининг ўринбосари Дилшод Аҳатов бошчилигидаги делегация Қоҳирага ташрифи доирасида 15 сентябрь, якшанба куни Миср савдо ва саноат вазирининг биринчи ўринбосари Аҳмад Антар ҳамда инвестициялар ва халқаро ҳамкорлик вазирининг ўринбосари Реда Бебарс билан икки томонлама учрашувлар ўтказди.
Учрашувда Савдо-иқтисодий, илмий-техникавий ҳамкорлик бўйича Ўзбекистон—Миср ҳукуматлараро комиссиясининг 7-мажлиси доирасида бизнес форумини ўтказиш, шунингдек, икки мамлакат тадбиркорларининг Ишбилармонлар кенгашини ташкил этиш масалалари кўриб чиқилган, дея хабар бермоқда Ўзбекистон Ташқи ишлар вазирлиги матбуот хизмати.
Миср томони Ўзбекистон маҳсулотлари экспорт ҳажмини ошириш учун Мисрнинг Африка ва Яқин Шарқ мамлакатлари билан амалдаги эркин савдо режимида берилган имкониятлардан фойдаланишни таклиф қилган.
Бундан ташқари, Миср халқаро савдо тизими Тарифлар ва Савдо бўйича Бош Битим/Жаҳон савдо ташкилотининг асосчиси сифатида Ўзбекистоннинг ЖСТга кириш масаласида ҳар томонлама ёрдам беришга тайёрлиги маълум қилинган.
Изоҳ (0)