Ижтимоий тармоқларда ва Telegram мессенжерида турли номлар остида саҳифалар яратиб, ушбу саҳифаларда порнографик мазмундаги аудио, видео ва фото материалларни жойлаштириш ҳолатлари қайд этилмоқда, деб хабар беради Хоразм вилояти ИИБ ҳузуридаги тергов бошқармаси.
Айниқса, хотин-қизларнинг фотосуратлари ва шахсий маълумотлари (исми шарифи, яшаш манзили, телефон рақами)ни кўрсатган ҳолда, уларни гўёки ахлоқан бузуқликда айблаб чиқаётган саҳифалар кундан кунга ортиб бормоқда.
Ҳуқуқни муҳофаза қилувчи органлар томонидан юқоридаги каби ноқонуний ишлар билан шуғулланувчи шахсларни аниқлаш ва уларга нисбатан қонуний чоралар кўриш борасида тадбирлар амалга оширилмоқда.
Жумладан, 2019 йилнинг 23 июль куни Хоразм вилояти ИИБ ҳузуридаги тергов бошқармаси томонидан бир гуруҳ шахсларга нисбатан Ўзбекистон Республикаси Жиноят Кодексининг 140-моддаси (ҳақорат қилиш) 2-қисми билан жиноят иши қўзғатилди.
«Ушбу жиноят ишининг дастлабки тергови жараёнида хотин-қизларни ахлоқсизликда айблаб тарғиб қилаётган турли номлар остидаги каналларнинг аксарияти олдиндан жиноий тил бириктирган бир гуруҳ шахслар томонидан фаолият юритиб келаётганлиги маълум бўлди. Энг ачинарлиси ушбу жиноий гуруҳ таркибида аёлларнинг ҳам борлигидир.
Куни кеча ижтимоий тармоқларда тарқалган, ўзини Хоразм вилояти Урганч туманида яшовчи шахснинг видео мурожаатида қайд этилган мазмундаги аризаси ҳам Хоразм вилоятида ИИБ ҳузуридаги тергов бошқармаси томонидан тергов ҳаракатлари олиб борилаётган юқоридаги жиноят иши доирасида кўриб чиқилмоқда», — дейилади хабарда.
Изоҳ (0)