Ижтимоий тармоқларда 14 сентябрь куни «Хоразмда ЙПХ ходими аёл кишини дубинкада уриб ўлдириб қўйди» сарлавҳаси билан видеоёзув тарқалган эди («Дарё»да ушбу видеоёзув асосида «Ички ишлар органи ходими таёғи билан одамларни уряпти» сарлавҳали хабар чиққан эди).
Ўзбекистон ИИВ Жамоатчилик ва оммавий ахборот воситалари билан алоқалар бошқармасидан маълум қилишларича, воқеа Хоразм эмас, Самарқанд вилоятида юз берган; видеодаги можаро оқибатида ҳеч ким қурбон бўлмаган.
Нима тўполон?
12 сентябрь куни соат тахминан 18:30 да «Навоий—Ургут» йўналиши бўйлаб ҳаракатланиб келаётган Damas ЙҲХБ инспектори томонидан тўхтатилиб, ҳайдовчи — 2000 йилда туғилган, Тойлоқ туманида яшовчи Ж.С.нинг ҳужжатлари текширилганида, машинанинг суғурта полиси муддати ўтиб кетгани аниқланган. Инспектор ҳайдовчига нисбатан маъмурий баённома расмийлаштираётганида Damas’да бўлган 1965 йилда туғилган Қ.Р., унинг ўғиллари — 1988 йилда туғилган Қ.Б. ва 1993 йилда туғилган Қ.С. тушиб келиб, ЙҲХБ ходими фаолиятига тўсқинлик қилган.Ургут тумани ИИБнинг икки нафар профилактика инспектори Damas’дан тушган уч эркакка ЙҲХБ инспекторига тўсқинлик қилмаслик борасида тушунтириш берган. Шунга қарамай улар фаол қаршилик кўрсатиб, ҳақорат қилиб, ходимларни урган; фуқаро Қ.Р. профилактика инспекторининг ўнг елка погонини, Қ.Р.нинг ўғилларидан бири эса иккинчи профилактика инспекторининг чап елка погонини юлиб олган. Зиддиятга гувоҳи бўлган Қ.Б.нинг онаси, 1965 йилда туғилган У.Р. Damas’дан тушиб, уларни ажратиш мақсадида бораётганида қон босими кўтарилиб, ўзини ёмон ҳис қилган ва ерга йиқилган, лекин ҳушида бўлган.
Damas ҳайдовчиси Ж.С. эса фурсатдан фойдаланиб, ЙҲХБ инспекторининг қўлидан ўзига тегишли ҳужжатлар ва маъмурий баённомани тортиб олмоқчи бўлиб, фаол қаршилик кўрсатган ҳамда инспекторнинг кўкрак нишони юлиб олиб, қочиб кетган. Ж.С. 12 сентябрь куни соат 22:30 да танишлари орқали Ургут тумани ИИО ФМБга чақиртирилган, воқеани расмийлаштириш жараёнида ундан кўкрак нишони ҳужжатлаштириб олинган. Ҳозирда мазкур ҳолат юзасидан Ургут туман прокуратураси томонидан терговга қадар текширув ҳаракатлари олиб борилмоқда.
Аёлнинг аҳволи қандай?
Фуқаро У.Р.нинг соғлиғи ёмонлашганлиги сабабли профилактика инспектори уни йўлдаги автомашинага ўтказиб, тиббий ёрдам кўрсатилиши учун Ургут тумани «Сариқтепа» маҳалласидаги қишлоқ врачлик пунктига олиб борган. Аммо қишлоқ врачлик пунктида ҳеч ким бўлмаганлиги сабабли шу яқинда истиқомат қилувчи, ушбу врачлик пункти шифокорининг яшаш уйига олиб борилган.«Шифокор томонидан фуқаро У.Р.га тиббий ёрдам кўрсатилиб, ҳеч қандай тан жароҳати йўқлиги ҳамда қон босими пасайиб, аҳволи яхшиланганлиги сабабли, уйига жавоб берилган», — дейилади ИИВ ахборотида.
Аввалроқ Қорақалпоғистонда ҳам ички ишлар органи ходими аёл кишига қўл кўтаргани акс этган видеоёзув тарқалган эди. Қорақалпоғистондаги ҳолат юзасидан ИИВ бирор изоҳ бермади. Бош прокуратура томонидан берилган ахборотда эса ҳодиса оқибатида ички ишлар органи ходими тан жароҳати олгани таъкидланган.
Изоҳ (0)