Қишлоқ хўжалигида сув таъминоти хизматлари учун 2022 йилдан бошлаб тўлов тизими жорий этилиши мумкин. Бу ҳақда 14 сентябрь, шанба куни қишлоқ хўжалиги вазири Жамшид Хўжаев Ўзбекистонда қишлоқ хўжалигини ривожлантиришнинг 2020—2030 йилларга мўлжалланган стратегияси лойиҳаси тақдимотига бағишланган учрашувда айтиб ўтди, дея хабар бермоқда «Дарё» мухбири Мусулмонбек Иброҳимов.
Мавзуга доир: Қишлоқ хўжалиги вазири Жамшид Хўжаев: Фермерларга ер бериш ҳуқуқи ҳокимлардан олиб қўйилади
«Арзон бўлгани учун сувни кўп ишлатяпмиз ва исроф қилмоқдамиз. Шунинг учун стратегияда ижтимоий жиҳатларга, озиқ-овқат хавфсизлигига, шунингдек, экология ва табиий ресурслардан оқилона фойдаланиш масалаларига алоҳида эътибор қаратилган. Қишлоқ хўжалигига мўлжалланган ерларнинг умумий майдонини сувни тежайдиган технологиялар билан қамраб олишни 2018 йилдаги 5 фоиздан 2030 йилда 40 фоизга ошириш вазифаси қўйилган. Шу мақсадда яқин вақт ичида 2020—2030 йилларга мўлжалланган Сув хўжалигини ривожлантириш концепциясини қабул қилиш ҳамда сув ресурсларини бошқариш ва ирригация соҳасини ривожлантириш стратегиясини ишлаб чиқиш режалаштирилган», — деди вазир.Стратегияга мувофиқ 2021 йилда суғориш ва мелиорация соҳасида илк давлат-хусусий шериклик лойиҳаларини амалга ошириш кўзда тутилган. Суғориш инфратузилмаси қисман кластерлар, кооперативлар ва бирлашган ишлаб чиқарувчиларнинг бошқа шаклларига бошқарувга берилади.
Қишлоқ хўжалигида сув таъминоти хизматлари учун 2022 йилдан бошлаб тўлов тизими жорий этилиши мумкинлиги юзасидан Жамшид Хўжаев шундай деди:
«Сувнинг йўқотилишини камайтиришдан манфаатдор бўлиш фермерларни суғориш тизимининг самарадорлиги ва маҳсулдорлигини оширишга хизмат қиладиган инфратузилмани бунёд этишига таъсир қилади ҳамда бу мақсадлар учун давлат бюджети харажатларини қисқартиради. Ҳозирда сув қадри жуда тушиб кетган, бу эса кўпинча сув истеъмоли масалаларига лоқайдларча муносабатда бўлишга, сувнинг ҳаддан ташқари кўп сарфланишига олиб келмокда. Натижада шўрланиш, тупроқ минераллашуви, унинг қисман ёки тўлиқ бузилиши каби кўплаб муаммолар келиб чиқмоқда. Боз устига, қуруқ иқлим ва сув ресурслари чекланган бизнинг шароитда бундай бемаъни ёндашувлар нимага олиб келиши мумкинлиги ҳақида олдиндан ўйлаш муҳим», — деди қишлоқ хўжалиги вазири.Қишлоқ хўжалигини ривожлантиришнинг 2020—2030 йилларга мўлжалланган стратегиясида ерости сувларидан фойдаланувчиларнинг ягона давлат статистика ҳисоботларини юритиш зарурлиги қайд этилган бўлиб, сувни тежайдиган технологияларни ишлаб чиқарувчи маҳаллий корхоналар ва харидорларни қўллаб-қувватлаш режалаштирилган. Тупроқнинг шўрланиш даражасини кузатиб бориш учун вертикал ва ерости мелиоратив технологиялари ва тизимларини жорий этишнинг қўшимча механизмларини ишлаб чиқиш кўзда тутилган.
Маълумот учун, Жаҳон ресурслар институтининг маълум қилишича, 2040 йилга бориб Ўзбекистон сув танқислиги юқори бўлган 33 мамлакат қаторидан жой олади. Шу боис мамлакатда мавжуд ирригация тизимларини модернизация қилиш, янгиларини қуриш зарурати туғилмоқда. Ўзбекистондаги суғориш тармоқларининг 70 фоизи антифилтрацион қопламага эга эмас ва бунинг натижасида етказиб бериш босқичида сувнинг бир қисми йўқолмоқда. Бугунги кунда қишлоқ хўжалигини суғориш суви билан таъминлашдаги йўқотишлар 40 фоизга баҳоланмоқда.
Изоҳ (0)