Тошкент шаҳар Ички ишлар бош бошқармаси интернет тармоғида «Flavio Briattore» ники остидаги фойдаланувчи томонидан қолдирилган норозилик постига муносабат билдирди.
«Flavio Briattore» ники остидаги фойдаланувчи ундан шахсини тасдиқловчи ҳужжатларни талаб қилган ва ҳужжат бўлмаганлиги сабабли уни ички ишлар органлари таянч пунктига йўл олишни талаб қилган профилактика инспекторининг ҳаракатларидан норозилик билдирган.
Чилонзор тумани Г35 массивида жойлашган «Ал Хоразмий» маҳалласининг ҳудудини айланиб чиқиш давомида, 10-сонли уйнинг кириш жойи ёнида турган, кириш эшигини оча олмай, турли кодларни синаётган эркак киши ушбу ҳаракатлари билан ички ишлар органлари ходимида шубҳа уйғотган. Кимнинг ёнига келгани ҳақидаги саволга фуқаро «холамникига», «энаганинг ёнига» каби мужмал жавоб берган. Шахсни тасдиқловчи ҳужжатларни тақдим этиш ҳақидаги илтимосга ҳам аниқ жавоб бермасдан, ходимга «ўзингиз кимсиз?», «ҳужжатларни нимага асосланиб талаб қиляпсиз?», «нимага мен ўзим билан паспорт олиб юришим керак?» деган қарама-қарши саволлар бера бошлаган.
Шу йўл билан ходимни эмоционал муомалага мажбур қилган 32 ёшли фуқаро суҳбат давомини ўзининг мобил телефонига тушира бошлаган.
Шунга қарамасдан, Тошкент шаҳар ИИББ ходими ўзини намунали тутмаганини ва ортиқча эҳтиросга берилганини тан олади. Ҳозирги вақтда ходимга нисбатан хизмат текшируви олиб борилмоқда.
«Ҳурматли фуқаролар! Ички ишлар органлари ходимлари – сиз каби инсондирлар ва сиз каби турли ҳис-туйғуларни бошдан кечиришади. Аммо уларнинг фаолиятларининг хусусияти шундаки, улар бошқа касб эгаларидан кўпроқ жиноят жабрланувчиларининг, гумонланувчиларнинг, уларнинг қариндошлари ва яқинларининг ҳамда гувоҳларнинг негатив ҳиссиётларига дуч келишади. Айнан юқоридаги ҳолатга тўхталиб ўтсак. Ўзингизни ходимнинг ўрнига қўйиб кўринг: сиз кўриб қолган нотаниш шахс подъезд эшигини очишга уринаётганидан унинг бу ерда яшамаслиги кўриниб турибди. Сиз қандай йўл тутган бўлардингиз? Сизнинг асосли саволларингизга менсимаган ҳолда савол билан жавоб қайтаришса, нима қилган бўлардингиз?
Ҳуқуқий давлатда фуқаролар ва давлат органлари вакиллари – муносабатлари ҳурматга асосланган тенг шерик, ўзаро боғлиқ элемент ҳисобланади. Бизда эса, афсуски, тез-тез давлат органлари ходимларига қарши чиқишнинг гувоҳи бўлиш мумкин. Тошкент шаҳар ИИББ танқидга тайёр, аммо танқид холис ва конструктив бўлиши керак. ‘Ҳаммаси ёмон бўлганлиги учун ёмон’, ‘илгари ҳам шундай бўлган... бундан кейин ҳам шундай бўлади’ каби ҳужумларнинг ҳеч кимга фойдаси йўқ. Бундан, ҳатто, муаммосини ҳуқуқий майдонда эмас, интернетга ҳал қилишга уринаётган ‘танқид’ муаллифи учун ҳам фойда йўқ.
Шу ўринда солиқларни эслаб туришни хуш кўрадиганлар учун айтиб ўтамиз: барча бошқа фуқаролардан ушлаб қолинганидек, ички ишлар органлари ходимларидан ҳам даромад солиғи ушлаб қолинади», — дейилади ИИББ хабарида.
Изоҳ (0)