Комил Ўринов ов қилиш қоидаларига амал қилмаганлиги ва эҳтиётсизлиги оқибатида қариндоши Комил Маттиевни отиб қўйиб, унинг ўлимига сабабчи бўлди. 1977 йилда туғилган қоракўллик Комил Ўриновга нисбатан нисбатан суд ҳукми ўқилди. Бу ҳақда «Дарё»га Жиноят ишлари бўйича Жондор туман суди раиси Бахрулла Жабборов маълум қилди.
Олиб борилган терговолди суриштирув ишлари давомида Комил Ўринов қариндоши Комил Маттиев ҳамда таниши Илёс Янгиев билан Қоракўл туманидаги «Абдувоҳид Жамол боғбон» фермер хўжалигига қарашли ер майдонларига ов қилиш мақсадида боргани аниқланган.
Чўл ҳудудида жойлашган саксовулзор ва қамиш-тиканзор бўлган бу ҳудудда дўстлар ов чоғида ёввойи қуш — қирғовулни кўриб, уни овлаш пайига тушган.
Комил Ўринов ов милтиғидан қирғовулга қарата ўқ узади. Бироқ, ўқ қирғовулнимас, ўзидан олдинда бўлган Комил Маттиевни жароҳатлайди. Сочма ўқдан қаттиқ жароҳатланган Комил Маттиев шифохонага олиб кетилаётган пайтда автомашинада вафот этган.
Содир этилган ҳолат бўйича олиб борилган тергов ҳаракатлари жараёнида Комил Ўринов хонадонида тинтув ўтказилган. Унга тегишли бўлган Иж-17 русумли ов қуроли, 1 калибрли 18 та ва 2 калибрли 19 та ов патрони ва гилзалар ашёвий далил сифатида олинган. Бундан ташқари, марҳум Комил Маттиевга тегишли ТОЗ русумли ов милтиғи Қоракўл туман ИИБга юборилган.
Комил Ўринов Жиноят кодексининг 102-моддаси 1-қисмида назарда тутилган жиноятни содир қилганликда айбдор, деб топилган ва унга нисбатан Жиноят кодексининг 45-моддаси қўлланилган. Унга кўра, 2 йил муддатга муайян ҳуқуқдан маҳрум қилиш, яъни овчилик фаолияти билан шуғулланиш ҳуқуқидан маҳрум қилинган, шунингдек, 2 йил муддатга озодликдан чеклаш жазоси тайинланган.
Бироқ, жабрланувчи Р. Маттиевнинг судланувчи Комил Ўриновга нисбатан даъвоси йўқлиги инобатга олиниб, озодликдан чеклаш жазоси чегирилган ва ўташ учун 1 йил 9 ой озодликни чеклаш жазоси қолдирилган.
Изоҳ (0)