Komil O‘rinov ov qilish qoidalariga amal qilmaganligi va ehtiyotsizligi oqibatida qarindoshi Komil Mattiyevni otib qo‘yib, uning o‘limiga sababchi bo‘ldi. 1977-yilda tug‘ilgan qorako‘llik Komil O‘rinovga nisbatan nisbatan sud hukmi o‘qildi. Bu haqda “Daryo”ga Jinoyat ishlari bo‘yicha Jondor tuman sudi raisi Baxrulla Jabborov ma’lum qildi.
Olib borilgan tergovoldi surishtiruv ishlari davomida Komil O‘rinov qarindoshi Komil Mattiyev hamda tanishi Ilyos Yangiyev bilan Qorako‘l tumanidagi “Abduvohid Jamol bog‘bon” fermer xo‘jaligiga qarashli yer maydonlariga ov qilish maqsadida borgani aniqlangan.
Cho‘l hududida joylashgan saksovulzor va qamish-tikanzor bo‘lgan bu hududda do‘stlar ov chog‘ida yovvoyi qush — qirg‘ovulni ko‘rib, uni ovlash payiga tushgan.
Komil O‘rinov ov miltig‘idan qirg‘ovulga qarata o‘q uzadi. Biroq, o‘q qirg‘ovulnimas, o‘zidan oldinda bo‘lgan Komil Mattiyevni jarohatlaydi. Sochma o‘qdan qattiq jarohatlangan Komil Mattiyev shifoxonaga olib ketilayotgan paytda avtomashinada vafot etgan.
Sodir etilgan holat bo‘yicha olib borilgan tergov harakatlari jarayonida Komil O‘rinov xonadonida tintuv o‘tkazilgan. Unga tegishli bo‘lgan Ij-17 rusumli ov quroli, 1 kalibrli 18 ta va 2 kalibrli 19 ta ov patroni va gilzalar ashyoviy dalil sifatida olingan. Bundan tashqari, marhum Komil Mattiyevga tegishli TOZ rusumli ov miltig‘i Qorako‘l tuman IIBga yuborilgan.
Komil O‘rinov Jinoyat kodeksining 102-moddasi 1-qismida nazarda tutilgan jinoyatni sodir qilganlikda aybdor, deb topilgan va unga nisbatan Jinoyat kodeksining 45-moddasi qo‘llanilgan. Unga ko‘ra, 2 yil muddatga muayyan huquqdan mahrum qilish, ya’ni ovchilik faoliyati bilan shug‘ullanish huquqidan mahrum qilingan, shuningdek, 2 yil muddatga ozodlikdan cheklash jazosi tayinlangan.
Biroq, jabrlanuvchi R. Mattiyevning sudlanuvchi Komil O‘rinovga nisbatan da’vosi yo‘qligi inobatga olinib, ozodlikdan cheklash jazosi chegirilgan va o‘tash uchun 1 yil 9 oy ozodlikni cheklash jazosi qoldirilgan.
Izoh (0)