Ўзбекистоннинг сайлов тўғрисидаги қонун ҳужжатларига тузатиш киритилди

Сайлов тизимининг такомиллаштирилиши муносабати билан Конституция ва бир қатор қонунларга тузатишлар киритилди, дея хабар бермоқда «Norma.uz».

4 сентябрда имзоланган қонунда кўзда тутилган тузатишларнинг кўпи Сайлов кодекси кучга кирганлиги билан боғлиқ ва қонун ҳужжатларини унга мувофиқлаштиришга йўналтирилган.

Хусусан, унда қуйидагилар акс эттирилган:

• оғир ва ўта оғир бўлмаган жиноятлар содир этганлиги учун суднинг ҳукми билан озодликдан маҳрум этиш жойларида сақланаётган шахсларнинг сайлов ва референдумда иштирок этиш ҳуқуқи. Шу тариқа, ҳозирда оғир ва ўта оғир жиноятларни содир этган шахсларгина фаол сайлаш ҳуқуқидан маҳрум этилган;
• сайлов комиссиясининг янгиланган ваколатлари;
• сайловчиларнинг ягона электрон рўйхати юритилиши;
• сайлов комиссияси ва референдум ўтказиш комиссияси аъзоларига қўйиладиган талаблар;
• сайловолди ташвиқотини олиб бориш қоидалари;
• овоз беришни ташкил қилиш ва ўтказиш тартиби — вақти ва жойи, бино ва хоналарни расмийлаштириш талаблари, сайлов комиссиялари ҳаракати, олдиндан овоз бериш механизмлари ва бошқалар.