Самарқанд вилоятида 2019 йилда 1 958 фермер хўжалиги томонидан 75 580 гектар майдонга чигит экилган ва ҳосилни йиғиштириб олиш, қайта ишлаш учун вилоятдаги саккизта пахта-тўқимачилик кластери билан шартнома тузилган. ЎзАнинг хабар беришича, ҳозирда кластерларнинг 31 та пахта тайёрлов масканида ҳосилни қабул қилиш учун зарур шарт-шароит яратилган.
Етиштирилган пахтани тез ва қисқа фурсатларда йиғиб-териб олиш учун 2 250 та терим отряди ташкил этилган, керакли миқдорда транспорт воситалари ажратилган.
Вазирлар Маҳкамаси ҳузуридаги агросаноат мажмуи устидан назорат қилиш инспекцияси Самарқанд вилоят бошқармаси бошлиғи биринчи ўринбосари Даврон Очиловнинг сўзларига кўра, 2019 йилда ҳар гектар ердан ўртача 27,1 центнер ўрнига 33,7 центнер ҳосил олиш кутилмоқда.
«Бу қабул масканларига вилоят бўйича режада белгиланган 205 минг тонна ўрнига 255 минг тонна пахта етказиб берилади, дегани. Эътиборли жиҳати, бу йил вилоятимизда пахта хом ашёси тўлиқ кластер корхоналари томонидан етиштирилди. Фермер хўжаликлари ушбу 8 кластер корхонаси билан шартнома тузди», — деди Очилов.
Изоҳ (0)