Наманганда «Косонсой-фарм» эркин иқтисодий зонасида якунланган илк лойиҳа — Spring Pharmaceutic корхонаси ишга туширилди. Бу ҳақда «Дарё» мухбири Азизбек Абдувалиев хабар бермоқда.
Корхонага ЭИЗ ҳудудидан ўтган йили 1,7 гектар ер ажратиб берилганди. Бир йил ичида жами қиймати 18 миллиард сўм бўлган лойиҳа амалга оширилди. Корхона маҳаллий тадбиркорнинг маблағи ҳисобига қуриб битказилди.
70 та янги иш ўрни яратилган корхонада йилига 60 турдаги 25 миллиард сўмлик дори-дармон воситалари ишлаб чиқарилади.
Эркин иқтисодий зонага умумий қиймати 51 миллион АҚШ долларидан ортиқ бўлган 13 та лойиҳа танлаб олинган. Уларнинг деярли ярми — 24 миллион доллари хорижий инвестициялардир. 2021 йилга бориб барча лойиҳалар якунлангач, йиллик ишлаб чиқариш ҳажми 100 миллиард сўмдан ортиқ замонавий ишлаб чиқариш корхоналари ва 1000 га яқин иш ўрнига эга бўлинади.
Ҳозирги кунда ана шу лойиҳалардан умумий қиймати 8,5 миллион долларга тенг 6 таси амалга оширилмоқда, қолганлари ҳам бошланиш арафасида.
«Косонсой-фарм» эркин иқтисодий зонасида, шунингдек, Корея, Россия, Миср ва Беларусь давлатлари билан ҳамкорликдаги янги йирик лойиҳалар ишлаб чиқилмоқда. Украина ҳамда Ҳиндистон ҳам бу соҳада Наманган вилояти билан ҳамкорлик қилишга қизиқиш билдирган.
Изоҳ (0)