Туркманистон шимолидаги Тошҳовуз вилояти қишлоқлари бўшаб қолмоқда, деб ёзади «Хроника Туркменистана».

Фото: «Хроника Туркменистана»

Авваллари бир оиладан бир киши четга ишлаш учун кетган бўлса, ҳозирга келиб бутун бошли оилалар бутун умрга мамлакатни тарк этмоқда.

Медей, Дюечи, Дерман, Пахталик, Гурбансолтан-эже каби қишлоқларнинг ярмидан кўпроқ аҳолиси хорижга кетган.

«Қишлоқ ҳовлиси бу уй паррандаларининг овози, болалар шовқини. Ҳозир эса ҳаммаёқ тинч, ҳовлилар бўш, уйлар ёпиқ. Фақат ит ва мушуклар ташландиқ ҳовлилар ҳамда кўчаларда санғиб юрибди.

Аксарият оилалар уйларини сотмай кетмоқда. Улар қачондир ватанда ҳаёт яхши бўлса, қайтиб келишга умид қилмоқда. Кўпчилик эса ‘Бизга бундай ватан керак эмас!’ дея бир умрга кетмоқда», — дейди қишлоқда яшовчи фуқаролардан бири.

Қайд этилишича, қишлоқда уй сотиш жуда мушкул. Харидор йўқ. Пули бор одамлар аллақачон уй сотиб олган. Бу ерда уйлар беш мингдан 10 минг долларгача баҳоланади.