Тошкентда қаровсиз қолдирилган болалар гугурт ўйнаб, 2 та уйни ёқиб юборди

Тошкентда назоратсиз қолдирилган болалар уйни ёқиб юборди, деб хабар беради ФВВ ЁХББ ОАВ билан ҳамкорлик қилиш бўлинмаси.

2 сентябрь, душанба куни соат 10:20 да Тошкент шаҳар Мирзо Улуғбек тумани «Сайрам» МФЙ Қаландар тор кўчасида жойлашган 4/1 ва 16-уйларда ёнғин содир бўлаётганлиги ҳақида ёнғин-қутқарув хизматига хабар келиб тушган.

Хабар асосида воқеа жойига 4 та ёнғин ўчириш бўлинмаси жалб этилган. Биринчи бўлинмалар кўрсатилган манзилга соат 10:24 да етиб борган. Кўрилган тезкор ҳаракатлар натижасида ёнғин соат 10:40 да қуршаб олинган ва 10:51 да тўлиқ ўчирилган. Ёнғин оқибатида 4/1-уйнинг 40 квадрат метр майдонда ва 16-уйнинг 20 квадрат метр майдонида том қисмлари ёниб зарарланган. Ёнғиндан уйларнинг 200 квадрат метр майдони сақлаб қолинган.

Тан жароҳати олганлар ва ҳалок бўлганлар қайд этилмаган. Назоратсиз қолдирилган ёш болаларнинг гугурт ўйнаши натижасида мазкур ҳолат юзага келган, дея тахмин қилинмоқда. Моддий зарар миқдори аниқланмоқда.