Пекинда ҳамкорлик бўйича Ўзбекистон—Хитой Ҳукуматлараро қўмитаси йиғилишини ўтказишга тайёргарлик доирасида энергетика соҳаси бўйича қўмита ҳузуридаги ишчи гуруҳнинг бешинчи йиғилиши бўлиб ўтди.
Томонлар Хитойнинг етакчи компанияларини жалб этган ва уларнинг тажрибасидан фойдаланган ҳолда Ўзбекистонда қуёш энергетикаси соҳасида соҳа стандартлари ва синов лабораторияларини яратиш борасида ҳамкорлик қилишга тайёр эканликларини маълум қилди.
Бундан ташқари, нефть-газ, кўмир, электр энергетикаси, табиий уран ва қайта тикланувчи энергия манбалари соҳасидаги ҳамкорлик масалалари ва истиқболлари кўриб чиқилди.
Нефть-кимё, хом ашёни қайта ишлаш орқали юқори қўшимча қийматли маҳсулот ишлаб чиқариш ва ишлаб чиқаришни маҳаллийлаштириш соҳаларида ҳамкорлик қилиш юзасидан келишувларга эришилди.
Экспертлар даражасида фаол учрашувлар ўтказиш ва истиқболли лойиҳаларни батафсил қайта ишлаш бўйича қарор қабул қилинди.
Мажлисда Наманган вилоятида маиший чиқиндиларни қайта ишлаш йўли билан экологик тоза электр энергияси ишлаб чиқариш бўйича ўзаро англашув меморандуми имзоланди.
Лойиҳа тўғридан-тўғри Хитой компаниясининг сармояси асосида амалга оширилади.
Қўмита мажлиси якуни бўйича энергетика соҳасида ҳамкорлик борасида навбатдаги мажлис Тошкентда ўтказилиши бўйича келишувга эришилди.
Изоҳ (0)