Андижон вилоятидаги 34 та касб-ҳунар коллежининг бино-иншоотлари мебел ва ўқув-лаборатория жиҳозлари, спорт инвентарлари билан биргаликда халқ таълими тизими тасарруфига ўтказиш бўйича инвентаризация қилиниб, туман ва шаҳар ҳокимларининг қарорлари билан тасдиқланди. Бу ҳақда «Дарё»га вилоят халқ таълими бошқармаси ахборот хизмати хабар бермоқда.
Бош вазирнинг 2019 йил 16 июлдаги топшириғига асосан 2019—2020-ўқув йилида 15 коллеж ўрнида янги умумий ўрта таълим мактаблари ташкил этилган. Қолган 19 та касб-ҳунар коллежи биносига эса мавжуд мактаблар кўчирилиб, қўшимча бино сифатида берилган.
Вилоят халқ таълими бошқармаси бошлиғи Фурқатбек Бузруковнинг маълум қилишича, янги ўқув йили олдидан инвестиция дастурига биноан 26 та умумтаълим мактабида 85,7 миллиард сўмлик қурилиш-таъмирлаш ишлари амалга оширилган. Бундан ташқари, «Обод қишлоқ» ва «Обод маҳалла» дастурлари доирасида 29 та умумтаълим мактабида қурилиш-таъмирлаш ишлари олиб борилмоқда. Ушбу мақсадларга 101,4 миллиард сўмдан ортиқ маблағ йўналтирилган.
Шунингдек, вилоят ҳокимининг ташаббуси билан маҳаллий бюджет ҳисобидан Шаҳрихон ва Улуғнор туманларида 2 та янги мактаб қурилмоқда. Шу билан бирга, 20 та мактабнинг қурилиш-таъмирлаш ишлари учун 69,8 миллиард сўм маблағ маҳаллий бюджетдан ажратилиши белгиланиб, ҳозирда давом эттирилмоқда.
Таълим муассасаларининг моддий-техник ҳолатини яхшилаш мақсадида вилоятдаги халқаро тадқиқотларни амалга оширишга йўналтирилган 29 та таянч мактабининг ҳар бири маҳаллий бюджет ҳисобидан 87 та видеопроектор билан жиҳозланиб, уларга 201 миллион сўмлик кимё, физика, биология фан кабинетлари жиҳозлари ва лаборатория анжомлари етказиб берилган.
Вилоятда рўйхатдан ўтказилган 3 та нодавлат умумтаълим мактабида 564 нафар ўқувчи таълим олмоқда. 2019—2020-ўқув йилида яна шунча нодавлат мактаби очилиши режалаштирилган.
Изоҳ (0)