Самарқанд вилояти Isuzu русумли йўловчи автобуси MAN русумли юк машинаси билан тўқнашув содир этган. Ҳодиса 3 сентябрь куни соат тахминан 7:00 да Жомбой тумани Бешбола қишлоғи ҳудудида юз берган. Тўқнашув қандай, кимнинг айби билан юз бергани ҳақида аниқ маълумот йўқ. Соғлиқни сақлаш вазирлиги маълумотларига кўра, автобусда 31 нафар йўловчи бўлган. Уларнинг қайси манзилдан қаерга кетаётгани, шахси ва касб-кори ҳақида ҳозирча маълумот берилмади.
Автобуснинг бир йўловчиси воқеа жойида ҳалок бўлган, яна 22 нафар йўловчи турли даражада тан жароҳати олган. Барча жабрланувчилар 8 та тез тиббий ёрдам бригадаси кўмагида тезкор равишда Жомбой туман тиббиёт бирлашмасига олиб келинган. Айни вақтда 6 жабрланувчи Республика шошилинч тез тиббий ёрдам илмий маркази Самарқанд филиалига кўчирилган, 3 нафар беморга Жомбой туман тиббиёт бирлашмасида, 13 нафар беморга эса амбулатор тиббий хизмат кўрсатилмоқда.
Бу Ўзбекистонда сўнгги вақтларда автобуслар иштирокида юз берган ягона ЙТҲ эмас. Февраль ойида Жомбой туманида Isuzu автобуси Йўл ҳаракати қоидаларини қўпол равишда бузиши натижасида Nexia билан тўқнашган, оқибатда бир киши ўлган, уч киши тан жароҳати олган. 16 май куни Самарқанд шаҳрида Isuzu автобуси ва Spark иштирокидаги тўқнашув оқибатида автобус ағдарилган, уч киши тан жароҳати олган эди. 11 июль куни Сирдарё вилоятида 20 кишини олиб кетаётган Isuzu автобуси ағдарилиб кетган, камида 16 киши жароҳатланган. 24 август куни Тошкент шаҳрида ҳайдовчи бошқарувни эплай олмагани оқибатида Isuzu автобуси ағдарилган, оқибатда икки киши касалхонага ётқизилган, яна олти кишига касалхонада тиббий ёрдам кўрсатилиб, уйига жавоб берилган.
Вазирлар Маҳкамаси қарорига мувофиқ, 2019 йил 1 июлдан бошлаб автобуслар видеорегистраторсиз йўлга чиқиши мумкин эмас. Жомбойда ағдарилган автобусда ҳукуматнинг ушбу талаби бажарилганми ёки йўқ — ҳозирча йўқ. Агар видеорегистратор бўлса, у ҳолда ҳодиса айбдорини, ўз-ўзидан, ўнлаб одамларнинг жароҳатланишига сабаб бўлган жавобгарни аниқлаш қийин бўлмайди.
Изоҳ (0)